VRAE OOR BEOOGDE KOLLEGE
PLANNE vir ’n nuwe, private landboukollege in die Vaaldriehoek het die wenkbroue laat lig toe die indruk glo gewek is dat die beoogde kurrikula met die hulp van die gevestigde Landbou-ontwikkelingsinstituut Grootfontein ontwikkel is.
Talle vakkodes stem presies met dié van Grootfontein ooreen, wat ongewoon vir verskillende hoër onderwysinstellings is.
Sover Landbouweekblad kon vasstel, was niemand van Grootfontein egter daarby betrokke nie.
Me. Anita Preston, wat sê sy werk al drie jaar lank om die Vaallandboukollege op ’n plaas buite Vanderbijlpark op die been te kry, sê ook dit was ’n misvatting. Sy ontwikkel haar vak-kurrikula volgens eenheidstandaarde wat sy vanaf die AgriSeta, die owerheid vir onderwys en opleiding in die landbou, verkry het. Sy sê sy is in die proses om AgriSeta-registrasie te bekom.
Navraag by die AgriSeta het bevestig dat Preston nog nie ’n diensverskaffer-lisensie van dié owerheid verkry het nie.
Só ’n lisensie stel ’n diensverskaffer in staat om vakleerlingskappe aan te bied, wat amptelik deur AgriSeta onderskryf word.
Mnr. Fanny Phetla, bestuurder van gehalteversekering by AgriSeta, benadruk dat ’n AgriSetalisensie nie ’n instelling in staat stel om ’n hoër onderwysdiploma uit te reik, soos wat ’n geakkrediteerde kollege kan doen nie.
Om ’n naskoolse diploma te verwerf, word verdere registrasie en akkreditasie van onder meer die Raad op Hoër Onderwys en die SA Kwalifikasie-owerheid (SAQA) vereis.
Dit is meestal ook ’n ingewikkelde en tydrowende proses. Vol- gens Preston het sy ook reeds met dié prosesse begin.
Volgens ’n lys vakke en ’n pryslys wat sy by navraag aan Landbouweekblad gestuur het, beoog sy om studente van gr. 10 tot gr. 12 te onderrig, asook ’n reeks vakke wat oor drie tersiêre jare strek.
Sy sê sy wil die kollege-deure vroeg volgende jaar vir onderrig oopstel. Sy het nog nie personeel aangestel nie, maar sal van Oktober af onderhoude met onder meer afgetrede onderwysers voer. Sy het reeds kantoorpersoneel aangestel, sê sy. Bouwerk aan die geboue het volgens haar reeds op die plaas begin.