GOEIE PRYSE VIR AVOKADO’S

’n Sterk vraag na avokado’s op plaaslike én internasionale markte wat pryse hoër druk, help omte vergoed vir die kleiner oes van vanjaar. Die SA Avokado kwekers vereniging het onlangs sy oesskatting van 12,5 miljoen kartonhouers vir vanjaar afwaarts aangepas tot 11,5 miljoen kartonhouers.

Mnr. Derek Donkin, voorsitter van Subtrop (die sambreelliggaam vir subtropiese gewasse), sê daar is verskillende faktore wat die avokadooes vanjaar beïnvloed, waarvan die grootste die droogte van 2016 was.

Donkin sê van die boorde by Tzaneen wat verlede jaar onder hael deurgeloop het, het ook nog nie heeltemal herstel nie.

Hy sê die toekoms vir avokado’s bly nietemin rooskleurig.

SuidAfrika se aanplantings groei bestendig teen omtrent 1 000 ha per jaar.

Verskeie kwekerye brei nou uit om meer avokadobome te kan lewer.

Daar is ook nuwe kwekerye wat die lig sien. Dit sal alles help om die lang wagtyd vir nuwe avokadobome te verkort.

SuidAfrikaanse kwekers brei uit na lande, soos Mosambiek en Tanzanië, terwyl ’n groep Zambiese graanboere onlangs besoek aan Subtrop afgelê het om ondersoek in te stel na die potensiaal van avokado’s, makadamias en mango’s as alternatiewe gewasse vir mielies en soja.