JOU MENTOR IS JOU SEKURITEIT

DIE Land Bank gaan van nou af ook gerespekteerde mentors in ag neem wanneer opkomendeboerebydie bank vir finansiering aansoek doen.

Me. Portia Zulu, provinsiale bestuurder van die Land Bank, het op die African Farmers’s Association of South Africa (Afasa) se jeugkongres in Sandton gesê opkomende boere moet verskeie struikelblokke te bowe kom. Zulu was deel van ’n paneel wat finansiering en ondersteuning vir jong, opkomende boere bespreek het.

“Inligting, toegang tot insette en grond en kollateraal wanneer hulle vir lenings by die bank aansoek doen, is maar net die begin van die struikelblokke. Omdat hierdie boere gewoonlik nie oor kollateraal beskik nie, het die bank produkte ontwikkel wat nie hierdie faktor of kontantvloei in berekening bring nie,” het sy gesê.

Pleks daarvan neem die bank betroubare mentorskap in ag as sekuriteit wanneer ’n lening toegestaan word.

“’n Betroubare mentor sal dieopkomendeboerhelpom die nodige faktore, soos kontantvloei, produksieplanne en bestuur, reg te hanteer. Dit skep op sy beurt sekuriteit vir die bank dat die lening terugbetaal sal word en daarom neem die bank ’n goeie mentorskapprogram in ag. Trouens, dit kan die verskil maak tussen die besluit om te finansier of nie te finansier nie,” het Zulu gesê.

Mnr. Diale Mokgojwa, AgriSEB-bestuurder by Standard Bank, het gesê die bank het ’n mentorskapprogram op die been gebring om opkomende boere te help, waarvoor ’n aantal afgetrede boere aangestel is om aan jong boere die nodige kundigheid te verskaf.

“Dit is ’n diens wat die bank gratis verskaf aangesien die koste van ’n mentorskap nie ’n las op ’n opkomende boer se skouers moet wees nie,” het hy gesê.

— GERRIT BEZUIDENHOUT

* Lees op bl. 16 oor die Land Bank se jaarresultate.