‘PRIVATE GELD’ HOU DIE POLITICI UIT JOU BANKSAKE
GELD en die wêreld van geld is besig om drasties te verander. Die publiek moet bewus wees van ander vorme van geld en hoe dit magsbasisse kan verander, sê mnr. Dawie Roodt, hoofekonoom van die Efficientgroep.
Fisieke geld (munte en note, oftewel kontant) het ruilhandel vervang, maar transaksies met sulke geld is anoniem en kan gebruik word om belasting te ontduik. Dit is een van die redes waarom regerings nie van kontant hou nie. Daarteenoor werk digitale geld en transaksies tans deur finansiële tussengangers, soos banke, en die beweging daarvan kan nagespeur word – iets waarvan regerings hou.
Roodt, een van die sprekers op ’n onlangse skaapdag op die plaas Platkop buite Riversdal, het gesê daar is deesdae ook ander vorme van geld, die sogenaamde private geld.
“Dit is geld wat deur enigiemand uitgereik kan word. Dit is ’n manier om geld te desentraliseer in lande waar die geldeenheid net deur sentrale banke, soos die Reserwebank, in ’n monopolistiese stelsel uitgereik word.”
BANKE OORBODIG?
Volgens Roodt bestaan daar tegnologie, bekend as blockchain, wat dit moontlik maak om geld privaat uit te reik. “Blockchain berus daarop dat groepe mense wat by die geldeenheid betrokke is, mekaar kontroleer om seker te maak dat almal eerlik bly.”
In werklikheid is dit ’n klomp rekenaars wat mekaar dophou en anonimiteit verseker. “Enige groep mense kan private geld gebruik. Dit is veilig en vinnig, Dit is waar kriptogeldeenhede, soos bitcoin, vandaan kom.”
Daar is deesdae sowat ’n duisend sulke private geldeenhede en hulle het ’n gesamentlike markkapitalisasie van meer as $1 triljoen. Roodt sê die ora van Orania is ’n plaaslike voorbeeld van so ’n private geldeenheid. In dié stadium is die ora ’n papierbewys, maar Roodt help die
‘Die belangrikste is dat private geld en digitale transaksies die mag geleidelik uit politici se hande neem en terugplaas waar dit hoort – by die mense.’
dorp om die ora te digitaliseer sodat mense hul selfone kan gebruik om dit uit te ruil. Dit maak weer anonimiteit moontlik. Die groei in private geldeenhede kan moontlik mettertyd meebring dat banke heeltemal gaan verdwyn en sentrale banke nie meer nodig is nie.
BELASTING VERANDER
“Mense gaan begin om waarde onder mekaar te skep. Die waarde gaan in ’n elektroniese beursie op jou selfoon lê, en as die belastinggaarder vra om te sien watter transaksies jy gedoen het en watter inkomste jy verdien het, kan jy sê ‘ek het my wagwoord vergeet’,” sê Roodt.
Dit sal meebring dat belasting gaan verander van transaksiebelasting na belasting van tasbare goed, soos tolpaaie.
“Dit is die toekoms, maar die belangrikste is dat private geld en digitale transaksies die mag geleidelik uit politici se hande neem en terugplaas waar dit hoort – by die mense.”
Roodt het gesê hy beveel nie bitcoin as ’n belegging aan nie. “Koop vir jou bitcoins vir R100, speel daarmee en leer dit verstaan. Kry ’n beleggingsadviseur wat jou kan help om die grootste deel van jou portefeulje in die buiteland te belê, want daar is groot probleme in Suid-Afrika.”