SOVEREIGN-SAGE KRY ’N NUWE KINKEL BY

DIE private ekwiteitsonderneming Capitalworks se aanbod om Sovereign Foods te koop, het nie Country Bird Holdings (CBH) se belangstelling in Sovereign Foods geblus nie.

CBH, wat 34,1% van die genoteerde Sovereign besit, het in Julie verlede jaar ’n aanbod van R9 per aandeel gemaak vir die aandele wat hy nie besit nie. As die aanbod aanvaar is, sou die nuwe maatskappy Suid-Afrika se derde grootste hoenderprodusent gewees het.

Die bestuur van Sovereign het CBH se aanbod egter op verskeie maniere gefnuik.

Sovereign het nou op 10 Augustus bekend gemaak dat hy Capitalworks se aanbod van R12 per aandeel ondersteun.

Die maatskappy sê in ’n verklaring ’n sleutelvoorwaarde van die aanbod is dat Capitalworks meer as 50% van Sovereign se uitge- reikte aandele moet verkry. Capitalworks sê hy het die steun van 50,8% van die aandeelhouers.

TYDSBEREKENING

Mnr. Marthinus Stander, uitvoerende hoof van CBH, bevraagteken die tydsberekening van Capitalworks se aanbod so kort voor September wanneer CBH ingevolge JSE-reëls ’n nuwe aanbod sou kon maak. Aangesien CBH tans die grootste aandeelhouer is, vind hy dit ook vreemd dat nie Capitalworks óf Sovereign CBH gekontak het nie.

Capitalworks se aanbod van R12 per aandeel moet deur 75% van die aandeelhouers gesteun word. Sy alternatiewe aanbod behels dat Sovereign gedenoteer word, wat moontlik is omdat hy 50,8% van die aandeelhouers se steun het.

Stander sê as die alternatiewe aanbod deurgevoer word, sal Capitalworks potensieel 65% van die aandele van die ongenoteerde maatskappy besit en CBH naastenby 35%. Die twee maatskappye sal dan noodgedwonge met mekaar moet saamwerk, al was daar tot dusver geen kontak tussen hulle nie.

“Ons vind dit vreemd dat die Sovereign-direksie sy onomwonde steun aan Capitalworks se aanbod toegesê het. Dit is ten spyte daarvan dat dié maatskappy nie ervaring in die pluimveebedryf het nie en daartoe wil toetree te midde van groot struikelblokke.”

CBH wag op ’n omsendbrief wat op 7 September uitgestuur word en wat meer besonderhede sal bevat. “In dié stadium het ons nog te min inligting om te kan besluit of ons ’n teenaanbod wil maak.”

–

Dië bëstuur van Sovërëign hët CBH së aanbod ëgtër op vërskëië maniërë gëfnuik.