Wes-Kaap munisipaliteite moet die krane toedraai
TE midde van groeiende kommer oor die leë Wes-Kaapse damme gaan die provinsiale regering nou waterbeperkings op ál die provinsie se munisipaliteite begin afdwing.
Mnr. Anton Bredell (foto links), minister van plaaslike regering en omgewingsake, het verlede week alle munisipaliteite in die provinsie kennis gegee om ’n bepaling van hul waterbehoeftes te doen en daarvolgens die omvang van hul waterbeperkings aan te dui.
Dit kom amper drie maande ná die Wes-Kaapse premier, me. Helen Zille (foto regs), die provinsie tot rampgebied verklaar het.
In antwoord op ’n vraag van Landbouweekblad oor vordering met stappe om die provinsie se waterbronne uit te brei, het Zille se woordvoerder, mnr. Michael Mpofu, eers die navraag na Bredell se kantoor verwys, en toe ’n mediaverklaring van 31 Julie aangestuur waarin Zille aankondig dat die provinsiale regering toegeslikte toevoerkanale uit die Voëlvleidam gaan oopgrawe teen ’n koste van R3,5 miljoen, al is dit die plig van die nasionale Departement van Water en Sanitasie.
Die Wes-Kaapse regering vra reeds sedert Desember 2015 dat die provinsie tot rampgebied verklaar word. Zille sê die Stad Kaapstad het onlangs “inligting aangevra oor alle nuwe watertegnologieë in drie kategorieë, naamlik die volhoubare onttrekking van water uit akwifere, ontsouting en hergebruik”.
“Die voorleggings was baie bemoedigend en sal die basis vorm van ’n groot tenderproses wat binnekort begin om die nuutste tegnologieë in te span.”
Zille wil ook die koste van die werk aan die Voëlvleidam van die nasionale regering verhaal.
Me. Jeanne Boshoff, woordvoerder van Agri Wes-Kaap, sê verlede week se reënbuie het landboutoestande grootliks onveranderd gelaat en weidingstoestande is kritiek, veral in die ekstensiewe landbougebiede van die Weskus en die Sentraal-Karoo. Al kry die gebiede goeie reën, gaan dit maan- de duur om te herstel.
Daar is ook kommer oor die domino-uitwerking van die droogte op die ekonomie in die landelike gebiede, want die droogte se uitwerking strek veel wyer as die boere. Verskeie besproeiingsboere het ook reeds aangedui dat hulle sal moet kies watter gewasse om te besproei weens lae reserwes.
REËNVOORUITSIGTE
Die provinsie se damvlakke het verlede week op 29,4% gestaan, teenoor 57,7% verlede jaar. Aan die einde van die reëntyd is die provinsie se damme gewoonlik meer as 80% vol. Volgens mnr. Cobus Olivier, weervoorspeller by die SuidAfrikaanse Weerdiens, is daar ’n aanduiding dat goeie reën dalk van nou tot einde September kan val, maar dit kan nie met hoë waarskynlikheid voorspel word nie.
Hy sê vir die droogte om gebreek te word, moet ’n gebied normale of bonormale reënval kry én waterbronne moet heraangevul word.
‘Daar is ook kommer oor die dominouitwerking van die droogte op die ekonomie.’