BOERESTOEIMETJAN TAKS SE DRAADWERK

RAADOP boere wat sukkel om hul BTW- en dieselrabat-eise afgehandel te kry, meen die Suid-Afrikaanse Inkomstediens (SAID) stel onpraktiese en onuitvoerbare eise.

Kenners waarsku reeds sedert die begin van die belastingjaar dat belastingbetalers meer oudits van opgawes kan verwag. Dit blyk die geval te wees nadat Landbouweekblad met verskeie raadop boere gepraat het.

Mnr. Johan Blomerus, ’n mielieboer van die plaas Wonderfontein by Kroonstad, beskryf sy BTW- en dieselrabat-eise as ’n “nagmerrie”.

“Hulle soek diensrekords van trekkers, vragmotors en bakkies, die GPS-koördinate van jou plaas en elke onderneming waarmee jy sake doen. Hulle soek ook fakture van alle aankope en vergelyk dit met jou logboeke,” sê hy.

Hy sê sekere vereistes is onprakties en onuitvoerbaar en meen die SAID verskuif net die doelpale om uitbetalings te vertraag.

Hy is tans midde-in ’n SAID-oudit van sy BTW-eise vir 2015 en 2016. Solank die oudits aan die gang is, ontvang hy geen uitbetalings vir daardie belastingjare nie.

VERTRAGINGS

Me. Seugnet Engelbrecht, ’n lusernboer en vervoerkontrakteur van Brits, sukkel sedert einde Februarie om haar BTW-terugbetalings te kry. Sy het ’n dispuut verklaar met die hulp van ouditeurs in Pretoria, maar sy moet nou nóg 90 dae wag vir dié proses om sy loop te neem.

Nadat boere in die Klerksdorp-omgewing verlede jaar groot vertragings met die terugbetaling van dieselrabatte ervaar het, sê mnr. Boeta du Toit, hoofbestuurder van Agri Noordwes, hy weet nie van mense met nuwe probleme in dié verband nie. Hy weet egter van lede wie se probleme nog nie opgelos is nie.

Du Toit sê Agri SA het met die SAID gesprek gevoer oor die vertragings.

“Daar is sekere reëlings wat getref moet word en sommige boere gebruik private ouditeurs om probleme op te los,” sê hy.

Hy sê Agri Noordwes verskaf riglyne aan boere en wys hulle hoe om logboeke by te hou. “Dit is dan die boer se verantwoordelikheid om die riglyne in die praktyk toe te pas.”

FRUSTRASIE

Mnr. Brian Hoole, ’n raadslid van Agri Oos-Kaap, sê die organisasie het geen formele klagtes van nie-betaling van BTW of dieselrabat-eise ontvang nie, maar verskeie boere het in ’n werksessie op Alexandria hul frustrasies oor die terugbetalings uitgespreek.

“In die meeste gevalle sê die inkomstediens die inligting is onvoldoende of onvolledig,” sê hy.

Mnr. Sandile Memela, woordvoerder van die SAID, sê die omstandighede van elke saak bepaal die tydperk vir terugbetalings, maar die diens is besig om die administrasie van dieselrabatte te moderniseer, wat doeltreffendheid sal verbeter.

Hy voeg by dat boere op die hoogte moet bly van wat die SAID saam met belastingsopgawes vereis.

Hulle moet ook alle relevante dokumene bewaar en beskikbaar hê ingeval hul onderneming gekies word vir ’n oudit. —

‘In die meeste gevalle sê die inkomstediens die inligting is onvoldoende of onvolledig.’