FORUM BESPREEK TALLE ASPEKTE

Die konsepbeleid oor nasionale diere-identifikasie, die byhou van aantekeninge en opspoorbaarheid is te ambisieus en gaan te duur wees om toe te pas, het mnr. Dave Ford, voorsitter van die Rooivleisbedryfsforum, op dié forum se jaarvergadering in Pretoria gesê.

Hy het gesê die Departement van Landbou, Bosbou en Visserye wil voortdurend nuwe, onrealistiese beleid toepas, maar daar word nagelaat om bestaande beleid wat uiters belangrik is vir die volhoubaarheid van die bedryf, in werking te stel. Ford het in sy voorsittersverslag gesê dit is belangrik dat alle belanghebbendes in die rooivleisbedryf hul verskille uit die weg ruim en saamwerk om die bedryf in die huidige moeilike sake-omgewing vorentoe te neem.

Die konsepbeleidsdokument oor diereidentifikasie, die byhou van aantekeninge en opspoorbaarheid het ’n gemengde ontvangs gekry. In sy huidige vorm is die konsepvoorstel nie vir die veebedryf aanvaarbaar nie. Die forum het ’n voorstel by die departement ingedien dat ’n ander benadering vir die toepassing daarvan gevolg word. Die voorstel sluit in dat die huidige diere-identifikasiestelsel meer vaartbelyn gemaak word.

Ford het gesê die vleisbedryf het nie regtig vordering gemaak om enige voordeel uit die Amerikaanse wet op groei en geleenthede in Afrika (Agoa) te trek nie. Daar was gesprekke met amptenare van die departement oor die forum se ongelukkigheid met toegewings wat dié departement en die Departement van Handel en Nywerheid gemaak het, asook die moontlikheid dat die rooivleisbedryf daaraan kan deelneem. Daar is ooreengekom dat die Rooivleisbedryfsforum ’n gemagtigde afgevaardigde sal identifiseer om die Amerikaanse vraelys, asook die dossier vir die aansoek om status as vry van malbeessiekte, in te vul.

HUIDEBELEID

Die voorgestelde nuwe beleid oor die uitvoer van huide is nou ’n werklikheid. Dit behels ’n algehele verbod op die uitvoer van onverwerkte beesvelle, ’n tarief van 20% in die eerste jaar op nat velle en beskadigde huide en ’n tarief van 40% van die tweede jaar af.

Volgens Ford doen die forum se regsadviseurs opvolgwerk met die Departement van Handel en Nywerheid en die Tesourie. Dié instellings het nog nie gereageer op korrespondensie en die wetlike roete wat in dié verband gevolg mag word nie. Die forum meen indien dié beleid ingestel word, sal dit verreikende ekonomiese implikasies vir die bees- en abattoirbedryf inhou.

Onlangse samesprekings met die huidebedryf het bewys dat die graderingstelsel vir huide weer onder die loep geneem moet word, aangesien die huidige stand van sake huide van ’n swak gehalte bo dié van ’n beter gehalte bevoordeel.

VLEISINSPEKSIES

Die forum se hofaansoek wat die Minister van Landbou, Bosbou en Visserye verplig om onafhanklike vleisinspeksieskemas by alle abattoirs en op alle spesies toe te pas – soos deur die Wet op die Veiligheid van Vleis van 2000 bepaal – is in Februarie vanjaar ’n hofbevel gemaak. Die betrokke kennisgewings het in Julie in die Staatskoerant verskyn en aspirant-gemagtigdes het tot 4 Augustus gehad om te registreer. Die finale implementeringsdatum is einde vanjaar. Die forum sal voortgaan om die proses te monitor.

STRYD TEEN SIEKTES

Heelwat tyd is vanjaar bestee aan die nasionale brucelloseprobleem wat ’n groot bedreiging vir die veebedryf inhou. ’n Brucellose-bestuurskomitee het met ’n bewusmakingsveldtog op radiostasies begin wat gereeld herhaal sal word. Die departement het ’n voorgestelde brucellose-beleidsdokument versprei waarop die forum ook kommentaar gelewer het. Die welslae met die bestryding van die siekte sal grootliks berus op die aansporing wat boere ontvang as hulle hul beeste inent en kuddes laat toets, soos deur regulasies bepaal word.

Ford het gesê die herwinning van Suid-Afrika se status as vry van bek-en-klouseer, tesame met die voordelige wisselkoers, het die bedryf die geleentheid gebied om rooivleisuitvoer te verhoog. Die onbevestigde volume van 40 000 ton beesvleis wat glo in die afgelope jaar uitgevoer is, het Suid-Afrika egter nie as ’n netto uitvoerder van beesvleis gevestig nie. Die volume sal eerder onder meer deur Suid-Afrika se dieregesondheidstatus bepaal word.

Die forum het in samesprekings oor die toestand van grensheinings ’n omvattende ondersoek aan die departement voorgelê oor die impak van ’n uitbreking van bek-en-klouseer op die rooivleisbedryf.

Volgens Ford het die voortslepende sage oor die beskikbaarheid van entstowwe by Onderstepoort Biologiese Produkte (OBP) ’n kritieke aangeleentheid geraak. Die voldoeningskomitee het besluit om met regstappe voort te gaan en die OBP gedwing om bygewerkte inligting oor die produksie en beskikbaarheid van alle entstowwe op sy webtuiste te publiseer.

‘Welslae met die bestryding van brucellose sal grootliks berus op die aansporing wat boere ontvang as hulle hul beeste inent en hul kuddes laat toets.’

Dit is verder ook onvermydelik dat die Departement van Landbou, Bosbou en Visserye ’n hersiene voerwet sal publiseer om beter beheer oor die gehalte van voer wat aan vleisdiere gegee word, te hê. Die forum het die departement reeds vir etlike jare aangemoedig om beheermaatreëls in te stel wat prakties en regverdig is. Dit lyk asof die forum se voorstelle namens die veebedrywe wat hul voer self meng, wel in die laaste voorgestelde dokument wat vir kommentaar gepubliseer is, vervat is.

DROOGTE

Ford het gesê die vernietigende droogte wat in die laaste paar jaar voorgekom het, het ’n groot uitwerking op die bedryf en Suid-Afrika in die algemeen gehad. Die uitwerking daarvan kan in die laer veevoorraad en hoë pryse van slagvee gesien word. Saam met die swakker ekonomie en swakker koopkrag van verbruikers het dit daartoe gelei dat sommige abattoirs en slagplase hul deure moes sluit. Veeboere in die droogtegeteisterde gebiede sukkel ook om te oorleef. “Die finale uitwerking van die droogte gaan nog lank gevoel word,” het Ford gesê.

HIERDIE BLAD IS DEUR DIE RPO GEBORG. BERIGTE IS DEUR DIE RPO GESKRYF EN VERSKAF. RIG NAVRAE AAN DIE RPO BY TEL. 012 349 1102. E-POS: rpo@lantic.net. WEBWERF: www.rpo.co.za.