SKOP VAS TEEN SWAM BY AARTAPPELS
Die swam Rhizoctonia kan groot finansiële skade aan aartappels aanrig, maar met doeltreffende monitering en goeie bestuurspraktyke kan dit getroef word.
Prof. Jacquie van der Waals, plantpatoloog aan die Universiteit van Pretoria, het getoets of die besmetting van die aartappelmoere of die grond die grootste invloed op die oorsaak van siektesimptome het.
Dít was nadat dr. Norman Muzhinji bepaal het dat die Rhizoctonia-stam AG 3-PT betrokke is by die meeste siektesimptome wat deur Rhizoctonia veroorsaak word.
“Sodra die simptome begin verskyn, ongeag waar die besmetting plaasgevind het, moet dit behandel word. Dit is belangrik om te weet waar die besmetting plaasvind omdat dit verskillende bestrydings- en bestuursbesluite meebring,” sê Jacquie.
“Ons het gevind dat grond- en knolinokulasie met AG 3-PT ewekansig die voorkoms van swartskurf veroorsaak, terwyl wortel- en stolonkanker meer deur die inokulum in die grond veroorsaak word, en stamkanker deur AG 3-PT-besmetting in die moer veroorsaak word.”
As ’n boer dus slegs stamkanker in sy aanplantings bespeur, is die kans goed dat dit patogene organisme reeds in die moer teenwoordig was. “In daardie geval kan kwarantynpraktyke toegepas word en die boer moet sy bron van moere ondersoek. As wortel- of stolonkanker die probleem is, is die kans goed dat die grond reeds besmet is. Dis daarom belangrik dat boere seker maak dat hulle gesertifiseerde, skoon moere aankoop.
“Verder het ons ook gevind dat die AG 3-PT-groep hoë vlakke van geen- en genotipe-diversiteit binne ’n populasie het en dat dit seksueel en aseksueel kan voortplant. Dit bring mee dat die AG 3-PTgroep uiters aanpasbaar is en dus vinnig weerstand kan opbou teen plaagbestrydingsmiddels en verdraagsame kultivars.
“Ons raad aan boere is om deurgaans hul landerye te monitor, seker te maak waar die siekte kop uitsteek verskyn en doeltreffende plaagbestrydingspraktyke volg. Voordat hulle egter die siekte bestry, is die beste raad om seker te maak die plantmateriaal is gesond en die grond bly vry van patogene organismes.”
– JOHAN VAN DER MERWE