HOMMELTUIE NUWE PLAASWERKERS
Hommeltuie gaan binne die volgende drie jaar op die meeste plase ter wêreld ingespan word. En omdat hulle goedkoop gaan wees, sal dít nie net die geval in ryk lande wees nie, maar ook in die ontwikkelende wêreld.
Só voorspel die Duitse futuris Udo Gollub in sy jongste vooruitskouing oor hoe die wêreld teen 2020 daar gaan uitsien.
“Hommeltuie gaan oor plante vlieg en
die behoefte aan water, kunsmis en plaagdoders meet. Hulle sal data na die masjiene stuur wat water en kunsmis toedien. Op dié manier sal die plante nooit te veel kry nie (wat die produksiekoste verlaag), of te min kry nie (wat groter en beter gewasse sal verseker, wat die produksiekoste verder sal verlaag).
“Danksy hommeltuie gaan ons kos dus goedkoper en beter wees. Stelsels soos dié word al sedert 2015 in wingerde gebruik. Teen 2020 sal dit op die meeste plase wees.”
Wat energie betref, voorspel Udo dat talle steenkoolaanlegte teen 2020 gesluit gaan wees, tensy regerings onlogiese besluite neem. “Sedert 2016 is sonkrag die goedkoopste bron van energie in die meeste lande buite die Arktiese sirkel. Dit is goedkoper as steenkool en sonder die besoedeling.
“Ja, werkgeleenthede sal verlore gaan, maar dubbel die aantal van daardie werkgeleenthede word in die sonkragbedryf geskep. As jy op die uitkyk vir ’n belegging is: Sonkrag is nou een van die beste geleenthede, veral sonkragpanele op jou eie dak.”
Hy voorspel voorts toegankliker en goedkoop internet vir elke siel op die planeet. “In 2019 gaan minstens drie maatskappye ’n globale internet-netwerk bedryf, hetsy met weerballonne, soos Project Loon, of ’n vloot mini-satelliete wat laag sirkel, soos Oneweb.
“Dít sal gigagreep- mobiele internetverbindings na elkeen op hierdie planeet bring, teen ’n baie lae prys. Teen 2019 gaan elke boer in Uganda dus ’n vinniger en betroubaarder internetverbinding hê as wat jy vandag het.”
Udo het voorheen voorspel dat landbourobotte in die toekoms so goedkoop as $100 (sowat R1 300) gaan wees. “Boere in Derdewêreldlande sal dan bestuurders van hul lande kan word, pleks daarvan om heeldag op die lande te moet werk.”
Aëroponika gaan in die toekoms baie minder water benodig, meen hy ook. “Die eerste kalfsvleis wat in ’n petri-bakkie geproduseer is, is nou beskikbaar, en dit sal teen 2018 goedkoper wees as kalfsvleis wat vanaf ’n koei geproduseer word. Tans word 30% van alle landbou-oppervlakte gebruik om beeste aan te hou. Stel jouself voor as ons nie meer daardie spasie nodig het nie.
“Talle beginnerondernemings gaan binnekort insekproteïen begin bemark. Dit het ’n hoër proteïeninhoud as vleis. Dit sal as ’n alternatiewe bron van proteïen bemark word omdat die meeste mense steeds nie byt aan die gedagte daaraan om insekte te eet nie.” – MARLEEN SMITH