INTELEX WYS SY STAAL
Die chemiese maatskappy BASF het met proewe gerugte op sosiale media oor sy nuwe onkruiddoder Intelex die nek omgedraai.
Die mikpunt was om te wys dat BASF die beste opbrengs op boere se chemiese belegging kan bied, selfs in gebiede met hoë siektedruk, soos KwaZulu-Natal, en op plase waar geenbewerking gedoen word, het mnr. Antonio Parenti, bemarkingsbestuurder van BASF se oesbeskerming-afdeling, gesê.
’n Demonstrasieboeredag is op die plaas van mnr. Franz Putz by Winterton gehou.
Mnr. Bright Breytenbach, nasionale verkoopsbestuurder vir oesbeskerming by BASF, het gesê hoewel die aktiewe bestanddele in Intelex hoog wateroplosbaar is, en dus die beste resultate in droër toestande lewer, is dit steeds vir almal ’n goeie belegging.
Intelex-proewe by Middelburg, Mpumalanga, waaroor op sosiale media gerugte versprei is, is gedoen toe die distrik elke dag sowat 20 mm reën oor 25 dae gekry het.
“Enige onkruiddoder, ons s’n ingesluit, sal met soveel reën sukkel,” het Bright gesê.
Omdat geen ander produkte saam met Intelex gemeng hoef te word nie, bied die produk ’n atrasien- en mesotrioon-vrye vooropkomsbestryding teen onkruide.
Mnr. Dirk du Preez, verkoopsbestuurder vir rygewasse van BASF in KwaZulu-Natal, het gesê een toediening van Intelex op plase by Greytown was genoeg om selfs die groei van purperwinde te vertraag. Die middel bied ook ’n laer risiko van skade aan opvolggewasse, wat beteken geenbewerkingsboere kan dit met ’n geruste hart gebruik.
Oor die bekamping van swamme het Dirk gesê boere moenie eerste vra hoe lank ’n swamdodertoediening hou nie, maar wanneer die regte tyd is om te spuit.
Met BASF se Ceriax-swamdoderprogram het mnr. Les Freese van Winterton ondanks hewige haelstorms 5,68 ton koring per hektaar gestroop. Dit was 0,53 ton/ha meer as met sy tradisionele onkruiddoderprogram en het hom R1 800 meer wins per hektaar in die sak gebring. – ALWYN VILJOEN