Sweef bo die Vyf Grotes
Die vlieg van gemotoriseerde valskermsweeftuie is nie net ’n lekker stokperdjie vir buiteluggeesdriftiges nie; dit bied ook verskeie nuttige en praktiese toepassings vir boere.
Al hoe meer boere wil gemotoriseerde valskermsweeftuie op hul plase gebruik omdat dit kostedoeltreffend is en wildbestuur meer vaartbelyn maak.
Mnr. Eugene Cussons, ’n bewaringskundige, entrepreneur en wildboer van Mpumalanga, benut tegnologie ten volle. Hy is letterlik in die wolke oor die voordele wat valskermsweeftuie veral aan boere bied.
Nirvana Afrika is jou poort na een van die veiligste en avontuurlikste vorme van lugvaart.
Eugene en die Nirvana Afrika-span het die afgelope vier jaar die voorreg geniet om gemotoriseerde sweeftuie te gebruik as deel van ’n poging om wildbestuur en die bestryding van wildstropery beter toe te pas. Met behulp van die Tsjeggies gebaseerde Nirvana-span het Eugene die reeks produkte aangepas om doeltreffender te wees.
In die afgelope vier jaar was Nirvana-sweeftuie etlike honderde ure in die lug in diens van natuurbewaring. Dit was nie nodig om een noodlanding te maak nie. In dieselfde tydperk het vastevlerkvliegtuie en helikopters verskeie ongelukke gehad.
Om te bewys hoe goed die nuwe tegnologie werk, het die span onlangs olifante gaan soek in Mosambiek se Olifantpark. Om te vlieg oor die Vyf Grotes is ’n uiters opwindende ondervinding, maar ook ’n gevaarlike vorm van vlieg, sê Eugene.
“Die Olifantpark in Mosambiek is ’n ongelooflike, natuurlike omgewing met groen veld en natuurlike waterbronne.
“Van die spanlede moes vanaf die strand by Ponta de Ouro opstyg en om die Olifantpark sowat 25 km noord daarvan te vlieg. Die oogmerk was om aan Peace Parks die praktiese aanwending van die Nirvana-sweeftuig te de-
monstreer. Ons het ook gewys dat sekere take eenvoudiger verrig kan word met ’n Nirvana as met voertuie.”
Die moderne Poolse vlerktegnologie wat die span gebruik, het dit moontlik gemaak om veilig te vlieg aangesien die vlerkvorm stabiel bly in sterk wind.
Eugene sê die Piti-meer is asemrowend vanuit die lug en strek van die suidelike grens van die park ongeveer 8 km al langs die kus op.
“Die span het tydens die vlug so gevlieg dat hulle altyd binne sweefafstand van die oewer kon wees. Hulle het hordes seekoeie gesien wat onversteurd gebly het, al is oor hulle gevlieg vir foto’s.
“Ons het ’n groot groep olifante gevind wat vir mooi foto’s gesorg het. Dit het groot plesier aan die vlieëniers verskaf.”
Dit sou van geen waarde wees om diere af te skrik op eerste kontak nie en daarom monitor Eugene die gedrag van die diere terwyl foto’s met oorvlug geneem word. Indien die olifante onrustig voorkom, was die plan om hoër te vlieg en verder weg te beweeg vir kort periodes.
TOERUSTING
Sweeftuie se toerusting val in vier kategorieë: navigasie, kommunikasie, oorlewing en noodhulp. Navigasie moet so eenvoudig moontlik wees. Die instrumente moet maklik werk sodat die vlieënier hom kan toespits op vlieg en die take wat verrig moet word.
Vir kommunikasie is ’n goeie radio en valhelm belangrik. Nirvana het die FC5-valhelm ontwikkel wat radio- en telefoonoproepe kombineer.
Met ’n oorlewing- en noodhulptoestel het ’n vlieënier gemoedsrus dat as ’n noodlanding nodig is, is die nodige toebehore byderhand.