Diens gee Radium ’n voorsprong
Radium Engineering is ’n spesialis wanneer dit kom by plaaslik vervaardigde boerderytoerusting. Dié maatskappy se omvattende reeks werktuie van topgehalte en dienslewering verseker klante se lojaliteit.
Radium Engineering ontwerp en vervaardig die meeste van sy produkte op eie bodem. Dit sluit strooiers, grondbewerkingsen klipverwyderingstoerusting, swaailemsnyers, padskrapers en voermengers in.
Daaronder tel die plaaslik vervaardigde Radium PowerRip-beitelploeg en die gewilde reeks ProSpread-strooiers.
Een van die maatskappy se klante is mnr. Dirk Fourie wat naby Schweizer-Reneke in Noordwes op sy plaas Ganspan met mielies en sonneblom op droëland boer. Sy veevertakking sluit Bonsmarabeeste en Vleismerinoskape in. Hy boer ook met wild.
“Ek het sowat 13 jaar gelede die eerste keer met Radium Engineering begin sake doen. Die maatskappy se produkte en diens het my só beïndruk dat ek myself die afgelope dekade ’n getroue ondersteuner kan noem,” sê Dirk.
Hy is baie beïndruk met die maatskappy se persoonlike diens en aandag.
“Ek gebruik die maatskappy se skeurploegtande, swaardienstande en kalkstrooiers. Ek koop ook Radium se onderdele en gebruiksartikels, soos skottels en skare, wanneer onderhoud of vervanging nodig is.”
Dirk is veral beïndruk deur die pasgemaakte 16-tand-skeur- ploeg (“ripper”) wat hy by Radium Engineering gekoop het. Dit is volgens sy spesifikasies ontwerp en gebou.
“Ek is baie tevrede met die maatskappy se diens. As ons iets dringends nodig het, ry iemand van Radium dadelik uit. Hulle doen moeite om onderdele vinnig by ons te kry – veral wanneer ons nie kan bekostig dat ’n werktuig staan tydens kritieke stadiums, soos ploeg- en planttyd, nie.”
STROOIERREEKS
Radium se reeks strooiers is veelsydig, bekostigbaar en betroubaar. Dit is ideaal vir die verspreiding van kunsmis, kalk en gips, asook vir middelslag- tot groot hoeveelhede droë organiese materiaal.
Daar is iets vir elke grootte plaas en werklas. Die kleiner modelreekse sluit in die Compac- Spread (2,5-5 ton) en die EconoSpread (5-7 ton).
Die groter, derde generasie ProSpread-reeks (8-20 ton) is daar om vinnig en akkuraat groot hoeveelhede misstowwe te strooi. Dit is die ideale keuse vir die middelslag- en kommersiële boer, asook vir kontrakteurs wat op groot skaal werk.
Die strooiers bied oplossings vir bemesting in nou boorde en wingerde, maar ook vir grootskaalse bemesting op saaiplase, soos Dirk s’n.
Die verbeterde ontwerp van hierdie jongste generasie reeks strooiers beteken dat misstowwe in hoeveelhede van tot 5 t/ha teen 30 km/h gestrooi word na gelang van die model en trekker se vermoë. Die sleepstang van die ProSpread se topmodelle is geveer. Dit kan daarom vinniger, maar steeds veilig in landerye ry.
Die ProSpread is Isobusgereed, wat beteken dit kan inskakel by moderne trekkers se rekenaartegnologie.
Doen navraag by Radium Engineering oor die beskikbaarheid van Isobus-gereedheid in die verskillende modelle.
Inligting is ook beskikbaar oor kameras wat die operateur goeie sig van die strooier agter hom gee.
Wanneer boere in die donker moet werk, is daar ekstra beligtingsopsies op die strooiers wat werk veiliger en makliker maak.
GRONDBEWERKING
Vir konvensionele bewerking het Radium Engineering net die antwoord. Die PowerRip-beitelploeg is ’n praktiese en veelsydige oplossing vir die meeste primêre grondbewerkingstake.
Dit is ’n basiese, driepuntgemonteerde werktuig wat in praktiese groottes beskikbaar is. Die unieke ontwerp en tanduitskopmontering voorkom dat dit breek. Daar is sewe standaard-ploegtandkeuses. Dit kan van 5 tot 17 tande bevat sodat die ploeg by die beskikbare trekkrag van die meeste trekkers pas.
Wat die PowerRip uniek maak, is sy tanduitleg wat maklike materiaalvloei tydens grondbewerking moontlik maak. Dit verminder die aanpakking van materiaal in die tanduitleg en verminder slytasie op die onderdele.