OVK woeker!
Ondanks die droogte spog OVK vanjaar met sy grootste omset én wins nog. OVK bedank graag sy aandeelhouers daarvoor.
Die OVK Groep het vandeesmaand sy finansiële resultate vir 2017 bekend gemaak. Mnr. Stéfan Oberholzer, besturende direkteur van die OVK Groep, sê die besigheid het, ondanks ’n paar droë seisoene, steeds gegroei. Dié groei is te danke aan die volgehoue ondersteuning van meer as 10 000 boere-aandeelhouers.
OVK het ’n handelsnetwerk in die Oos-Vrystaat, Oos-Kaap en Noord-Kaap, asook landwye OVK Vesel- en Lewendehawe-dienste. Danksy dié wye geografiese gebied, sowel as die diversifikasie binne die besigheid, is daar altyd sekere gebiede en afdelings waarmee dit goed gaan en wat presteer.
“OVK bedryf reeds van sy aktiwiteite nasionaal. Hy sal beslis betrokke wil raak daar waar hy ’n verskil vir landbouprodusente kan bewerkstellig wanneer dit by ons bestaande onderneming inpas en sin maak. OVK is ’n boerebesigheid vir die hele land se boere,” sê Stéfan.
Die OVK Groep kan met trots verklaar dat sy netto wins voor belasting en ná die uitbetaling van lojaliteitskorting van R18,9 miljoen teenoor 2016 met 4,81% gestyg het. ’n Netto voorbelaste wins van R189 miljoen is behaal.
Aandeelhouers word vir hul volgehoue ondersteuning beloon met dividend- en lojaliteitskema-uitbetalings ten bedrae van R55 miljoen.
“OVK is in landbouers se besit en bedien ’n baie groot gebied. Dit onderskei die maatskappy van ander en gee OVK ’n nasionale teenwoordigheid, wat nuwe besigheidsgeleenthede vir die groep skep,” sê Stéfan.
Mnr. Wallie Weeks is onlangs bevorder tot hoofbestuurder van Vesel en Lewende-hawe in Port Elizabeth. Mnr. Japie Snyman is as hoofbestuurder van OVK Graan in Bloemfontein aangestel. Mnr. Frans Hugo is bevorder tot ’n nuwe pos as bestuurder van Vesel en Lewende-hawe in die Wes- en Suid Kaap.
Nog aankondigings oor nuwe bestuurslede vir Vesel word binnekort gemaak.