Bekamp siektes, plae veilig
Die bedryfsorganisasie CropLife SA is ’n kernvennoot in die toekoms van die landbou, openbare gesondheid en ’n gesonde omgewing. Sy sterk verteenwoordiging in die bedryf en sy lede se aktiewe deelname gee dié organisasie momentum.
CropLife SA is dié toonaangewende bedryfsorganisasie vir die plantbeskermingsbedryf. Meer as 90% van Suid-Afrika se verskaffers en verspreiders van middels vir plantbeskerming, openbare gesondheid en omgewingsbestuur word deur CropLife SA verteenwoordig.
Dit maak nie saak of dit klassieke plaagdoders, verbeteringsmiddels, onkruiddoders vir indringerplante of malariavektorbeheermiddels is nie, CropLife SA se lede verskaf betroubare, geregistreerde landboumiddels van gehalte.
Lede sluit in internasionale en plaaslike maatskappye wat landboumiddels invoer, vervaardig en deur ’n landwye netwerk van verspreiders lewer met agente wat met CropLife SA en AgriSETA se geakkrediteerde oesbeskermingskursus opgelei is.
Lede verskaf ook gesondheidsmiddels vir die bekamping van siektes en plae wat die mens se gesondheid en welstand bedreig.
MEELEWENDHEID
CropLife SA se lede neem aktief deel aan komitees en werkgroepe waar sake wat die landbousektor en openbare gesondheidsektor raak, uitgepluis word.
Die uitvoerende komitee hou wag oor die beleidsraamwerk waarbinne CropLife SA werk. Uitvoering word op verskeie vlakke bewerkstellig in verskeie ad hoc-werkgroepe en gevestigde komitees en werkgroepe: Oesbeskermingskomitee; Kaapse werkgroep; Veiligheidskomitee; Toedieningswerkgroep; Bestuiwersforum; Kleinverpakkingswerkgroep; Insekdoder-, onkruiddoder- en swamdoderweerstandskomitees; en Die Global Harmonisation System (GHS-werkgroep). Die diepliggende kundigheid van lede se werknemers is ’n groot bron van kundigheid tot voordeel van die bedryf, die landbou en die publiek.
WET 36 VAN 1947
Landboumiddels, soos wat dit in Wet 36 van 1947 omskryf word, behels alle plaagbestrydingsmiddels van chemiese of biologiese oorsprong, asook bevorderingsmiddels, plantgroeireguleerders, benatters en buffers.
Inligting oor alle geregistreerde landboumiddels is die afgelope dekade ingesamel en drie onafhanklike datastelle is saamgestel. Die mees basiese datastel is op die webwerf www.croplife.
co.za onder die vaandel “Agricultural Remedies Database”. Dit word elke maand bygewerk.
PLAAGBEHEERGIDS
Die reeks gedrukte gidse oor plaagbestryding, naamlik plantplae, plantsiektes, onkruide, indringerplante, huishoudelike plae en plantgroeireguleerders word elke twee jaar bygewerk. Dié gids behoort in elke boer se bakkie of kantoor te wees en is teen billike pryse beskikbaar.
CropLife SA se vlagskipdatastel is die AgriIntel-databasis wat al meer as 12 miljoen datapunte in ’n reusedatabasis hou. Die AgriIntel-webwerf, www.
agri-intel.com, is ’n gebruikersvriendelike soekenjin waar die boer data oor plaagbestryding by alle gewasse kan vind.
Produketikette is ook op AgriIntel beskikbaar. Kyk uit vir die nuwe AgriIntel wat ewe gemaklik op rekenaar, tablette en slimfone gebruik kan word.
AFVALBESTUUR
Leë plastiekhouers waarin plaagdoders was, is altyd ’n oorlas vir die boer, maar met CropLife SA se stelsel kan leë houers wat drie keer gespoel is, nou landwyd verwerk word in ander plastiekkommoditeite.
Uitgediende plaagdoders bly ’n probleem. Die enigste oplossing is dat die eienaar dit teen eie koste moet laat vernietig.
Kyk onder die hofie “AVCASA Waste Management Programme” op www.croplife.co.za vir aanwysings om leë houers skoon te maak vir verwerking.
’n Lys van plastiekverwerkers wat deur CropLife SA goedgekeur is en ’n lys van maatskappye wat uitgediende plaagdoders kan vernietig, is ook beskikbaar. Daar is ook ’n nuttige lys van moets en moenies van plaagdoderafvalbestuur.
WAGHOND
CropLife SA werk baie nou saam met die Registrateur van Wet 36 van 1947 en die inspektoraat van die direktoraat vir die beheer van landbou-insette.
Dié samewerking help om ongeregistreerde landboumiddels, onwettige bedrywighede en onaanvaarbare praktyke bloot te lê. Enige vermeende onwettige bedrywighede kan by CropLife SA aangemeld word.