Groot belegging in navorsing en saadtegnologie
DuPont het sowat R100 miljoen in die splinternuwe Afrika-tegnologie sentrum by Delmas belê. Dit bring ’n groot voordeel vir Pannar Saad.
Pannar is deel van die DuPont Pioneer-groep. Die splinternuwe Afrika-tegnologiehub, wat onder meer die grootste insektarium vir die bewaring en kweking van insekte vir navorsing in die Suidelike Halfrond insluit, dui op DuPont se verbintenis tot die landbou in Afrika.
Mnr. Alejandro Munoz, ondervoorsitter van Du Pont Global Commercial Business, het met die opening van die nuwe tegnologie sentrum naby Delmas in Mpumalanga gesê die maatskappy het sowat R100 miljoen in die sentrum belê.
“Die tegnologie sentrum is ’n manifestasie van DuPont se bereidwilligheid om op lang termyn in Afrika-landbou te belê. Dit is ’n manier om oplossings aan alle boere op die vasteland te bied vir uitdagings in hul boerderye,” het hy gesê.
Koste Die sentrum is een van vyf navorsingstasies wat wêreldwyd deur DuPont opgerig is. Die ander vier stasies is in Amerika, China, Brasilië en Indië.
“Die oprigting van die navorsingstasie stel DuPont in staat om navorsingskoste te besnoei met 98% per datapunt, en om navorsing vinniger en doeltreffender te verrig. Afrika is ’n belangrike en strategiese mark. Die navorsingstasie sal, met behulp van sy nuwe laboratoriums en insektarium, toegespits wees op die ontwikkeling van nuwe mieliekultivars met sterker weerstandigheid teen inseken grondgedraagde siektes, asook hoër droogteverdraagsaamheid,” het Munoz gesê.
Mnr. Prabdeep Bajwa, streeksbesigheidsdirekteur vir Afrika en die Midde-Ooste by DuPont, het op sy beurt gesê die vasteland bied groot geleenthede vir groei.
“Op die 35 miljoen hektaar mielies wat op die vasteland verbou word, is die gemiddelde opbrengs minder as 2 metrieke ton per hektaar. Dit is ons oogmerk om die produktiwiteit op die vasteland te verbeter en só ’n verskil in die lewe van die boere op die vasteland te maak,” het hy gesê. Kennis vir almal Benewens dienste aan kommersiële boere wil DuPont ook sy dienste aan kleiner boere verskaf.
“DuPont werk in Limpopo, Oos-Kaap en KwaZulu-Natal saam met die Departement van Landbou en die Landbou navorsingsraad om kleiner boere te ondersteun en op te lei. Daar is reeds ook hier ’n belegging van sowat R20 miljoen gemaak, met 3 000 kleinboere wat reeds by die projek betrek is.”
Hy het gesê DuPont wil opleiding elders in Afrika versterk met sowat 250 000 kleinboere wat na verwagting deel sal uitmaak van die maatskappy se ontwikkelings-projekte oor die hele vasteland.
DuPont het ook ’n navorsingsentrum op Hoogekraal naby Potchefstroom, wat navorsing op verskeie gewasse vir DuPont Pioneer en Pannar uitvoer. Die fokus van dié navorsing i sop droogte verdraagsaamheid vir die westelike produksiestreek.
Die nuwe navorsingsentrums open ook deure vir die wyer plantteeltbedryf om beter navorsing te doen. Só word opleidings- en opvoedkundige geleenthede vir personeel en akademiese instellings beoog om onder meer ’n plante teelt simposium aan te bied. Dit sal navorsings vaardighede ontwikkel en saam met kleinboere werk om die lewenstandaard van gesinne in landelike gemeenskappe te verbeter.
Suid-Afrikaanse navorsingsdata sal bydra tot DuPont se bank van kennis, wat van oral ter wêreld ingesamel word. Die geriewe by Delmas, Hoogekraal en ook die bestaande navorsingsgerief by Greytown in KwaZulu-Natal sal saam met ander navorsingspunte in Afrika deurlopend werk aan nuwe saadtegnologie vir die vasteland.