VOORDELE VAN GESAMENTLIKE BEMARKING
ME. LINDIE STROEBEL,
bestuurder van die produkbemarkingsvereniging PMA Suider-Afrika, meen die model van Market Demand Fruit (MDF) kan tot groot nut vir die gefragmenteerde varsproduktebedryf en veral die groentebedryf wees.
“Daar kan agt verskillende bemarkingskanale (vir vars produkte) gevolg word, waarvan bitter min groenteboere formele kontrakte of kopersprogramme van supermarkte gebruik. Die handjie vol wat dit doen, moet aan streng standaarde en baie vereistes voldoen, maar pluk ook die vrugte as hulle dit reg doen.”
Die meeste groenteboere lewer hul produkte op die varsproduktemarkte, waar dit met die samewerking van ’n agent verkoop word. Lindie sê die rol van die agente is baie belangrik. Die individuele groenteboere gebruik die geleentheid om ’n verhouding te bou met iemand wat ook ’n verhouding met die kopers bou en die mark goed verstaan.
“Maar die individuele boere kan soveel meer voordeel kry as hulle gesamentlik bemark – óf regstreeks aan ’n supermark óf deur ’n agent. Dan kan hulle, soos binne die MDF, hulle toespits op wat hulle goed doen, naamlik produkte lewer. Die rimpeleffek sal dan ’n meer volgehoue voorsiening van gehalteprodukte meebring en die boere sal dus aan kopersprogramme kan deelneem. Daar is werklik vir die individuele vrugteboer en die meeste groenteboere baie te leer by modelle, soos dié van MDF,” sê Lindie.
Volgens MNR. RUDI ENGELKE, ’n groenteboer van Joostenbergvlakte buite Kaapstad, is die probleem vir groenteboere om aan die streng vereistes te voldoen en ’n kopskuif te maak oor waar hulle hulself in die mark wil posisioneer. “Die meeste van ons groenteboere is nie gewoond daaraan om groente van topgehalte uit te soek en die res as tweede- of derdegraads in sakkies te druk nie. Ons is nóg minder gewoond aan die streng administratiewe vereistes van uitvoer- en bemarkingsprogramme.
“Vrugteboere wat al jare lank by die uitvoermark betrokke is, is al daaraan gewoond en ek dink nie hulle besef watter voordeel daardie leerskool vir hulle was nie. Daar is geen twyfel dat gesamentlike bemarking ’n goeie manier is om jouself teen onsekerhede te verskans en ’n beter bedingingsmag op te bou nie.”