STUUR GELD OOR LANDSGRENSE HEEN
Danksy ’n selfoontoepassing is dit makliker as ooit om geld van een land na ’n ander te stuur.
Menige plaaswerker reis sélf na ’n ander land om geld “huis toe te neem”, terwyl ander dit aan vriende toevertrou, wat ’n stewige fooi vir dié diens vra. Handelsbanke is een oplossing, maar nie vir mense wat min geld verdien en in afgeleë gebiede woon waar geen bankdienste is nie.
Mnr. Ribu Mabelane van die Hello Groep sê mobiele geldoordrag is ’n beter manier om geld te stuur en bemagtig boonop mense in die lae inkomstegroep. Volgens die Wêreldbank woon 70% van die wêreld se bevolking in landelike gebiede waar die landbou die grootste werkverskaffer is. Boonop is 42% van die boere op aarde nie lid van ’n bank nie.
In die lig van finansiële insluiting wat deel van die Nasionale Ontwikkelingsplan is, stel die Hello Groep ’n toepassing, Hello Paisa, beskikbaar waarmee geld met behulp van enige selfoon gestuur kan word; nie net met slimfone nie. Hello Paisa was die eerste onafhanklike instelling wat ’n lisensie vir dié doel van die Suid-Afrikaanse Reserwebank ontvang het. Daarmee kan ’n plaaswerker sy geld te eniger tyd aanstuur.
Mabelane beskryf dit as veilig, vinnig en goedkoop. Die gemiddelde versendingskoste bedra 5% teenoor koste van 15-20% wat deur sommige banke gehef word. Na raming het Hello Paisa werkers al R150 miljoen bespaar. Ongeveer 350 000 mense gebruik reeds dié diens.
Prys: Gratis