Nuwe kultivar beïndruk met hoë opbrengs
Danksy ’n sojaboonkultivar wat tot 6,2 ton per hektaar oplewer lewer, is ’n boer van Mpumalanga opgewonde oor die groter oes wat hy ingesamel het.
Mnr. Koos Uys van Delmas in Mpumalanga is aangenaam verras deur sy eerste ervaring dié seisoen met Agri Saad en Tegnologie se sojaboonsaad. Hy het ook vanjaar ’n deel van sy RA 568R-aanplanting vir Pioneer se Weeg en Wen-kompetisie ingeskryf. Hy hoop sy opbrengs van 6,21 t/ha op die twee hektaar wat ingeskryf is, kan die kompetisie wen.
Agri Saad en Tegnologie het in 2011 sy deure oopgemaak met saadbehandeling as hoofdiens. Sy eerste kultivars is in 2015 geregistreer.
Koos van Koos Uys en Seun Boerdery het 20 ha van Agri Saad en Tegnologie se kultivar RA 568R aangeplant. Die saad is verlede jaar die eerste keer kommersieel beskikbaar gestel.
GOEIE EIENSKAPPE
Sojaboonkultivars moenie oopspring wanneer dit stroopgereed is nie. Daar moet oessekerheid wees en die kultivar moenie te welig groei sodat siektes maklik kan ontwikkel nie.
“Die kultivar moet mededingend met die beste 20% kultivars in die land wees,” sê Koos. Gevolglik het die Santa Rosa-kultivar RA 568R hom baie beïndruk.
“Sy staanvermoë is puik. In ’n seisoen waar Sclerotinia erg was, is RA 568R glad nie geraak nie.”
In die algemeen was aalwurmdruk ook vir Koos ’n groot bekommernis, maar dié kultivar het ’n verdraagsaamheid daarteen en die opbrengs bewys dit.
“Ek het maklik ’n ton per hektaar meer geoes teenoor ander maatskappye se kultivars in vorige seisoene. Omdat my plaas se grond redelik sanderig is, strooi ek elke drie jaar 15 m3 hoendermis per hektaar. Ek doen dit net voordat ek sojabone plant. Die hoendermis stel die plantopneembare stikstof stadig vry, daarom sal dit nie alles in die eerste jaar opgebruik word nie.”
’n Derde van die landerye is onder besproeiing.
RA 568R
RA 568R is ’n mediumgroeier. Koos het dit op 2 November verlede jaar geplant en op 5 April gestroop. Die plantestand was 330 000 plante per hektaar met ’n ryspasiëring van 0,76 cm.
Voor planttyd bemes Koos breedwerpig met 200 kg 2:3:4 (36) NPK-kunsmis met sink. Hy gebruik Syngenta se chemiese onkruidspuitprogram.
“Dit bestaan uit ’n vooropkomsonkruiddoder en ’n glifosaatbespuiting as opvolg saam met ’n swamdoder. Ek het ook blaarvoedings van Metson gebruik.” Die gemiddelde opbrengs was 5,5 t/ha, maar op die 2 ha wat vir die Weeg en Wen-kompetisie ingeskryf is, het Koos 6,21 t/ha ingesamel.
SAADBEHANDELING
Agri Saad en Tegnologie behandel vooraf al sy sojaboonsaad met ’n langlewe-entstof. Dit is ’n fabrieksbehandeling en kan nie
op plaasvlak toegedien word nie.
“Ons doen dit met ’n saadbehandelingsmasjien van Argentinië. Die saad word eers met Apron en Celest, chemiese swamdoders van Syngenta, behandel, en dan met Elite Gold (langlewe-entstof) van MBFi. Dan word ’n polimeerlagie oorgesit wat help met die vloei van die saad binne die planter,” sê dr. Derick van Staden, navorsingsbestuurder by Agri Saad.
“Hierdie behandeling is uniek, want dit bied aan die boer ’n speling van 45 dae waarin hy die saad kan plant sonder dat die entstof doodgaan.”
Die boer het ook die reg om saad terug te hou aan die einde van die seisoen.
“Die voorwaarde daarvoor is dat die boer ’n klein heffing betaal, die saad by ons fabriek moet skoonmaak en dat ons dit weer vir hom behandel.”