Toyota se RAV4 raak nóg aantrekliker
Met meer as 400 verkope elke maand is die Toyota RAV4, een van Suid-Afrika se gunsteling-sportnutsvoertuie, ’n leier in sy marksegment.
Die Toyota RAV4, die jongste weergawe van Toyota se oorspronklike, kompakte sportnutsvoertuig, bied hope verbeterings, nuwe toerusting én ’n nuwe ontwerp.
Dié moderne sportnutsvoertuig het die kenmerkende veeldoelige voertuig geword wat die die waardigheid van sy naam weerspieël.
Of jy nou die groot laairuim van 480 liter (547 liter in VXmodelle met ’n ruimtebesparende noodwiel) vol wil laai met jou gesin se besittings, wegbreek vir ’n mannenaweek of jou branderplank na die naaste strand karwei – die RAV4 is net die motor vir jou.
Die RAV4 is ook ideaal vir die daaglikse skoolvervoer of om selfs die spreekwoordelike “hele rugbyspan” rond te ry.
OPKIKKERING
Uitstappies is kinderspeletjies danksy ’n magdom gemak- en geriefskenmerke, sitplek vir vyf en heelwat bekerhouers en berg- ruimtes regdeur.
Nog iets wat die lang pad genotvoller maak, is die nuwe spoedbeheer in al die GX-weergawes. Die bestuurder kan dié stelsel maklik deur die skakelaars aan die stuurwiel beheer. Die gevoel van die stuurwiel is ook met die gebruik van leerbekleedsel opgekikker.
Wat die buitekant betref, is ’n nuwe metaalvlokkie-rooi by die kleurpalet gevoeg.
NUUT, MAAR DIESELFDE
Die modelreeks bly dieselfde met ’n keuse van drie verskillende enjins en twee toerustingpakkette – die GX en die VX. Kopers kan ’n tweeliter-viersilinder, wat 107 kW en 187 N.m lewer, kies en aan óf ’n sesgang-handratkas óf ’n palwissel-transmissie (CVT) gekoppel is.
Dieselgeesdriftiges sal in hul skik wees met die lewendige 2,2 liter-enjin wat 110 kW en 340 N.m lewer en as die GX of die weelderige VX beskikbaar is.
Die GX-modelle pronk met die sesgang-handratkas, terwyl die VX-weergawes ’n outomatiese sesgangtransmissie het.
Die reeks word deur die soepel petrolaangedrewe viersilinder van 2,5 liter met die outomatiese sesgangtransmissie afgerond.
Dié enjin se kraglewering is ’n stewige 132 kW, terwyl sy wringkrag op ’n gesonde 233 N.m te staan kom. RAV4 2.0 GX 6MT RAV4 2.0 GX CVT RAV4 2.2D GX 6MT RAV4 2.2D VX 6AT RAV4 2.5 VX 6AT
GEMOEDSRUS
Al die RAV4-modelle word gedek deur ’n fabriekswaarborg van drie jaar of 100 000 km en ’n diensplan van vyf jaar of 90 000 km. Die pryse is op aanvraag beskikbaar.