Noordwes spog met moderne persaanleg
Epko se opgegradeerde persaanleg vir sonneblomsaad op Lichtenburg kan die volle sonneblomoes wat in Noordwes ingesamel word — en selfs meer — verwerk. Dit word as een van die modernste oliesaadpersaanlegte in Suider-Afrika beskou.
Die sonneblomsaadpersaanleg op Lichtenburg is onlangs weer deur Epko Oil Seed Crushing (Edms.) Bpk. in bedryf gestel nadat dit in 2015 afgebrand het. Dié belegging is ’n bewys aan sonneblomboere dat plaaslike en internasionale maatskappye in die Suid-Afrikaanse landbou se waarde en toekoms glo.
Epko is al sedert 1997 ’n betroubare vervaardiger en verskaffer van sonneblomruolie en sonneblomoliekoek van goeie gehalte. Die aanleg is sentraal geleë vir sonneblomprodusente in Noordwes en die Vrystaat.
In 2014 is ’n gesamentlike onderneming tussen die landboumaatskappy NWK en die wêreldwye landbousakeleier Louis Dreyfus Company (Edms.) Bpk. gevorm en is die opgradering van Epko se aanleg vir die verwerking van sonneblomsaad goedgekeur.
Louis Dreyfus Company is aan boord met sy internasionale verhandelingskundigheid en NWK se graanhanteringsgeriewe reg langs die Epko-aanleg bied die nodige logistieke ondersteuning.
FENIKS UIT DIE AS
’n Verwoestende brand het in 2015 amper ’n stokkie voor dié groot planne gesteek.
Die herbou en opgradering het egter teen September verlede jaar begin. Ná die heropbouproses is die eerste ruolie in Junie vanjaar by die nuwe aanleg onttrek.
“Die produk wat ons tans uit die aanleg kry, is uitstekend,” sê mnr. Jacques van Niekerk, uit- voerende hoof van Epko.
“Gehaltetoetse wys goeie resultate en die oliekoek uit die aanleg het ’n bogemiddelde proteïeninhoud. Die terugvoering van die raffinadery waarheen ons die ruolie stuur, is ook baie goed en hulle is tevrede met die produk wat ons lewer.
“Benewens die sonneblomruolie wat verder verwerk word tot sonneblomkookolie, vervaardig ons ook sonneblomoliekoek. Niks word vermors nie.
“Selfs die doppies word as brandstof in die stoomketels of as beddegoed in braaihoenderhuise gebruik.”
Sedert sy ontstaan wil Epko een van die doeltreffendste persaanlegte vir sonneblomsaad wees. Dié doelwit is intussen bewaarheid, want die aanleg word as een van die modernste oliesaadpersaanlegte in SuiderAfrika beskou.
Dit het afdelings vir skoonmaak, ontdop, pers, kondisionering, ekstraksie en oorgiet. Ná ekstraksie word ruolie in groot maat aan verskeie raffinaderye verskaf, terwyl oliekoek as neweproduk deur veevoervervaardigers gebruik word.
“Die senior personeel bestee baie ure om alles klopdisselboom te laat verloop sodat ons teen volle kapasiteit kan vervaardig. Gelukkig is die span toegewy aan die inbedryfstellingsproses,” sê Jacques.
HOË PRODUKSIEVLAK
Die aanleg is grootliks geoutomatiseer en tegnologie speel ’n groot rol om ’n hoë produksievlak te handhaaf. Tog is dit steeds ’n belangrike werkgewer in die omgewing.
“Tydens die herbou en opgraderingsproses was daar meer as 300 mense per dag op die perseel. Noudat die bouwerk klaar is, werk 91 mense hier.”
Dit wil voorkom dat daar in die 2017-’18-seisoen genoeg produk beskikbaar sal wees om Epko se produksievlakke winsgewend te hou.
“Louis Dreyfus Company verkry die sonneblom en dan word dit na die NWK-silo’s geneem. Teen volle produksie sal ons invoerkapasiteit 600 ton per dag wees, oftewel 20 trokvragte,” sê Jacques.
Die geprojekteerde jaarlikse produksie van sonneblomruolie is van 66 000 ton tot 80 000 ton en van sonneblomoliekoek is dit van 75 000 ton tot 82 000 ton.
Epko het ’n opbergingsvermoë van 2 miljoen liter ruolie en 2 400 ton sonneblomoliekoek.