Nuwe Breedplan-kriteria maak die speelveld gelyk
DIE gewilde Breedplan-bulkompetisies kry vanjaar ’n nuwe baadjie, met groter klem op genetiese vordering in ekonomiese terme deur middel van ekonomiese seleksie-indekse.
Die finaliste vir die Bul van die Jaar is die afgelope 15 jaar aanvanklik op die skoue in Pietermaritzburg, Vryburg, Pretoria en Windhoek, en later ook op Lichtenburg en Moorreesburg aangewys onder leiding van Suid-Afrika se voorste interrasbeoordelaar, mnr. Martin Seyfferdt. Die algehele wenner is dan aangewys op die jaarlikse Aldam-Vleisbeesskool, wat van vanjaar die Veeskool heet omdat daar nou ook groot klem op kleinveeboerdery is.
Die skool word deur die Lewendehawe Registrerende Federasie (LRF), Breedplan en Landbouweekblad aangebied.
NUWE KRITERIA
Dr. Michael Bradfield, hoof van Breedplan Suider-Afrika, sê die LRF het besluit om die verskillende Zoetis-bulkompetisies te vernuwe.
Zoetis se Bul van die Jaar op skoue sal vorentoe binne ras beoordeel word, waarna die finaliste oor skoue heen met mekaar vergelyk sal word. Die finale toekenning sal op grond van prestasiesyfers en hoofsaaklik ’n seleksie-indeks wees. Zoetis se Beproefde Bul van
die Jaar is nou ’n kompetisie waarin die bulle in minstens drie kuddes met ekonomies belangrike eienskappe moet presteer.
Zoetis se Prestasiegetoetste
Jong Bul van die Jaar betrek voortaan alle bulle in die bedryf. Rasbeoordelaars of keurders sal self elke telersgenootskap se finaliste aanwys. Die Land Bank se Koei
van die Jaar is tot dusver gekies op grond van die tien beste koeie in elke teler se kudde, gegrond op reproduksie, prestasie en groei of karkasprestasie. Voortaan sal die wenners op grond van ekonomiese seleksie-indekse gekies word, waar van toepassing. Die grootste verandering is dat die hele kudde nou in aanmerking geneem word.
Bradfield sê omdat seleksie-indekse gebruik word, het klein en groot kuddes ’n gelyke kans om te presteer indien koppelbulle oor kuddes heen gebruik word.
TELERS
Die vereistes vir Pick n Pay se
Teler van die Jaar is onveranderd. Die beoordelaars neem die genetiese vooruitgang in die kudde, waardetoevoeging tot die bedryf en die teler se betrokkenheid in die bedryf in aanmerking.
Die vereistes vir Pick n Pay en Rudd Skaal se Opkomende Teler van die Jaar bly ook dieselfde. Enige opkomende stoet- of kommersiële boer mag deelneem. Die kriteria vir die BKB-eerbewys vir volledigheid van rekordhouding
is strenger gemaak vanweë die groot aantal deelnemers wat nou ook rekordhouding doen en dus in aanmerking kom. Vir nog navrae bel dr. Michael Bradfield, tel. 012 667 5258.