Voëlgriep versprei na Wes-Kaap
TWEE volstruisplase by Heidelberg in die Wes-Kaap is met die hoogs aansteeklike pluimveevirus H5N8 besmet en onder kwarantyn geplaas.
In Mpumalanga en Gauteng moes honderdduisende hoenders reeds weens dieselfde virus van kant gemaak en eiers vernietig word om verdere verspreiding te voorkom. Hoewel die virus nie skadelik vir mense is nie, bring dit groot verliese vir die pluimveebedryf, wat verlede jaar reeds R46 miljard aan droogte en invoer verloor het.
Braaihoenders en eierproduk- sie se randwaarde maak steeds met 18% die grootste deel van die land se landbou uit.
Dié nuutste uitbreking is die eerste geval van die H5N8-virus onder volstruise. Sowat 2 000 volstruise word geraak.
Me. Bronwynne Jooste, WesKaapse landbou-woordvoerder, sê hoewel die volstruise positief vir die virus getoets het, is geen voëlvrektes in die gebied aangemeld nie. Plase binne ’n 3 kmradius van die geaffekteerde plase is onder kwarantyn geplaas en verdere toetse word in die omliggende gebied gedoen.
Teen druktyd is daar nog nie besluit of die volstruise van kant gemaak sal word nie. Intussen het die provinsiale departement reeds aansoek gedoen om bykomende finansiering vir die toepassing van sy siektebeheermaatreëls en ook vir moontlike vergoeding aan boere waar dit van toepassing sal wees.
ENT OF NIE?
Dié nuutste geval bring die aantal uitbrekings op 16 te staan (hoofsaaklik in Mpumalanga en Gauteng) sedert die eerste een in Junie.
Benewens die twee volstruisplase is die virus bevestig by agt kommersiële hoenderplase, twee groepe werfhoenders, drie groepe wilde voëls en een groep ganse.
Me. Bomikazi Molapo, woordvoerder van die Departement Landbou, Bosbou en Visserye, sê die departement het versoeke ontvang dat voëls teen die virus ingeënt moet word en het bevestig die versoek word oorweeg.
“Op die oomblik word die inenting teen [H5N8] verbied in belang van die langtermynvoordeel van die pluimveebedryf.”
Die Wes-Kaapse departement van landbou het op sy beurt aangedui dat daar tans geen voorkomende entstof of behandeling teen die H5N8-virus is nie.
Die praktyk wat meestal wêreldwyd toegepas word, is om die geaffekteerde voëls van kant te maak.