Die onafhanklike trustee
AS die wysigingswetsontwerp op drankprodukte verander word om die gebruik van sorghum vir die produksie van bier in te sluit, sal dit ’n nuwe plaaslike mark vir dié kommoditeit skep.
Só sê Graan SA in sy voorlegging aan die Parlement oor die voorgestelde wysigings aan die Wet op Drankprodukte (Wet 60 van 1989), wat die produksie en verkoop van alkoholprodukte beheer.
Die Drankwet (Wet 27 van 1989) bevat byvoorbeeld nie ’n definisie vir bier, tradisionele Afrikabier en ander gefermenteerde drankies nie. Dié wysigingswetsontwerp (B10-2016) moet dié tekortkoming regstel.
In sy huidige vorm bepaal die wysigingswetsontwerp dat minstens 35% van die gisbare aftreksel van die mout waarmee bier gemaak word, van moutgars of -koring moet kom. Dit beperk dus die gebruik van graansorghum in bierproduksie. Die wysigingswetsontwerp maak slegs voorsiening vir die gebruik van sorghum in die maak van tradisionele Afrikabier.
Dié beperking maak dit dus moeilik om sorghum as ’n plaasvervanger vir gars of koring, wat dien as ’n styselbasis vir bier, in die produksieproses te gebruik.
GLUTENVRYE MARK
Volgens dr. Dirk Strydom, bestuurder van graanekonomie en -bemarking by Graan SA, is graansorghum vir die brou van alkoholiese drankies veral wenslik in die lig van ’n groeiende mark vir glutenvrye bier en ander glutenvrye produkte. Graansorghum word wêreldwyd gebruik om spiritualieë van hoë gehalte, veral whiskey, te maak.
Hy voer aan deur graansorghum uit te sluit, kan hierdie nuwe markte nie ontsluit word nie. Dit sal ook ’n versperring bied vir die toetreding van landbouverwerking in die land.
Volgens Graan SA is daar hoegenaamd geen rede waarom sorghum uitgesluit moet word in die verwerkingsproses en as grondstof vir spiritualieë en die brou van bier nie. “Die wysiging van die wet kan help om nuwe plaaslike markte en geleenthede vir landbouverwerking, werkskepping en ’n meer stabiele voedselprysomgewing te skep.”
TERUG NA PARLEMENT
Me. Apiwe Nxusani-Mawela,
stigter van Brewster’s Craft, ’n onderneming wat onder meer brouers oplei, meen daarteenoor die gisbare aftreksel van die mout moet van 35% tot 50% verhoog word om te voorkom dat hoë konsentrasies vloeibare suiker gebruik word om die gistingsproses te versnel.
Sy stem saam met Graan SA dat die grane wat in die brou van bier gebruik word, nie net tot gars en koring beperk moet word nie omdat sommige bier met gemoute sorghum, giersgras, rog en selfs rys gemaak word. Party Afrikalande gebruik selfs kassawe om bier te maak.
“SABMiller en mikrobrouerye in ander lande op die vasteland het bewys dat dit moontlik is om helder bier te brou deur ander grane as gemoute gars te gebruik.”
Nxusani-Mawela stel ook voor dat die maksimum alkoholinhoud vir bier op 10% gestel word.
Die Parlement se portefeuljekomitee vir landbou, bosbou en visserye moet nou beraadslaag of enige veranderinge aan die wetsontwerp gemaak gaan word.
—