BRANDSTOFPRYS: SLEGTE NUUS VIR DIE LANDBOU
Vandeesmaand se brandstofprysverhogings van 19c/l vir diesel en 29c/l vir petrol is ongelukkig nie die einde van die slegte nuus nie – nóg ’n skerp styging is op pad.
Mnr. Dawie Maree, hoof van landbou-inligting en bemarking by FNB, sê die middel van die maand se berekenings toon dat ’n skerp styging van meer as 50c/l in die dieselprys op 6 September verwag kan word as gevolg van onderverhaling. “Vir petrol kan ons ’n nóg groter styging van meer as 60 c/l verwag. Dit kan egter verander as die internasionale ruoliepryse daal en die wisselkoers versterk. Die dollar én die rand is tans baie wisselvallig.”
Hy sê die beweging in die wisselkoers is tans verantwoordelik vir gemiddeld 5c/l in die onderverhaling. Die groot onderverhaling is aan die produkpryskant met van 50c/l tot 60c/l vir die verskillende produkte.
“Die verwagte skerp styging in brandstofpryse is uiteraard nie goeie nuus vir boere en verbruikers nie. Wat boerdery betref, is dit ’n maand vir betreklik lae verbruik, maar aan die vervoerkant is dit nie goed vir boere nie, veral vir die vervoer van mielies wat laat geoes is.
“Verder doen boere nou voorbereiding vir die nuwe planttyd in September/Oktober, wat weer maande is vir hoë dieselverbruik. Dieselkoste is ’n groot inset in die landbou en vir elke styging van 1c/l beteken dit dat die sektor R10 miljoen op ’n jaargrondslag meer aan diesel bestee. As die prys dus met 50c/l styg, sal die totale koste vir die bedryf toeneem met R500 miljoen in ’n jaar.”