Tap sonenergie nou doeltreffender
Sonnige Suid-Afrika het oorgenoeg sonlig om elektrisiteit op te wek. Die doeltreffendheid en bekostigbaarheid van sonkragtegnologie is nou ook veel beter as ’n paar jaar gelede. Alfatek Kontrakteurs wys hoe die nuutste tegnologie jou kan bevoordeel.
Nuwe tegnologie in die sonkragbedryf bring beter opsies aan die boer wat minder afhanklik van die nasionale kragnetwerk wil wees, of wat elektrisiteit ver vanaf die bestaande plaaskragnetwerk nodig het.
Alfatek Kontrakteurs se sonkragprodukte is ideaal vir waterpompe wat nie naby ’n kragpunt is nie, en ’n kragopwekker nodig het. Die maatskappy benut nuwe VSD- (varieerbare spoeddryf) sonkragtegnologie. Dit is ’n verbetering op die VSD-tegnologie wat al dekades lank wêreldwyd ingespan word.VSD-sonkragtegnologie maak dit moontlik om water kostedoeltreffender aan boorgate te onttrek.
Die gebruik van hierdie sonkragtegnologie op plase is wyd. Benewens waterpompe en boorgate kan dit gebruik word om waterbehandelingstoerusting, spilpunte en ander tipes besproeiingstelsels aan te dryf. Dit is ook nuttig in die bosboubedryf, vir watertoevoer na huise, wild- en veekampe, die instandhouding van swembaddens en die aandrywing van brandvoorkomingstoerusting.
Enige driefasepomp kan met VSD-sonkragtegnologie aangedryf word. Sterk boorgate kan toegerus word met dompelpompe van tot 45 kW wat tot 220 000 liter per uur lewer.
SUPERSONKRAG
VSD-sonkragstelsels is eenvoudig en verg min onderhoud. Dit skakel maklik in by enige nuwe of bestaande driefasepomp en dit is onnodig om spesiale sonpompe te installeer. Topvervaardigers se sonkrag-VSD’s is ongeveer 98% doeltreffend. Dit lewer tot 30% meer water as standaard-VSD’s in dieselfde tyd.
Die stelsel is ontwerp om pompe te beskerm teen oorbelading, oorspanning, droogloop, oorverhitting, lae frekwensie en ander probleme wat kan opduik as wisselvallige elektrisiteitslewering ’n kwessie is.
Hierdie sonkragstelsels behaal lae bedryfskoste en hoë opbrengskoerse, met baie lae rand-per-liter-pompkoste vergeleke met konvensionele elektriese pompe of die dieselkoste van kragopwekkers.
Sonkrag-VSD’s laat die water vloei en die syfers klop.
BETROUBARE DIENS
Alfatek Kontrakteurs (Edms.) Bpk. lewer ’n professionele ingenieursdiens aan die landbou en spesialiseer in industriële installasies van sonpanele en -pompe.
Die maatskappy staan reg om te help as jy ’n sterk boorgat op jou plaas wil toerus met sonkrag of ’n groot pomp wil aandryf, of enige ander sonkraginstallasie op jou plaas verlang.
Wees op die uitkyk vir Alfatek se uitstalling op Agri Megaweek wat van 13 tot 16 September op Bredasdorp gehou word.