WETTIGE HANDEL IN HORING GEE SY EERSTE TREË
MNR. JOHN HUME, Suid-Afrika se grootste renosterboer, beskou sy onlangse aanlynveiling waarop 500 kg renosterhoring te koop aangebied is, as ’n sukses.
Dit is ondanks etlike pogings van diereregte-organisasies en selfs staatsamptenare om die veiling te dwarsboom.
“Aangesien ons tot op nommer 99 nog’ n dringende Hooggeregshof aansoek moes bring om me. Edna Molewa, die Minister van Omgewingsake, te dwing om die toestemming s permit vir die veiling te oorhandig, kon ons nie al die voornemende kopers betyds registreer nie,” sê mnr. Pelham Jones, voorsitter van Suid-Afrika se private renoster eienaars vereniging( PRO A ).
Jones sê die veiling het ’n sterk plaaslike vraag na renosterhoring as kommoditeit bevestig en gewys daar is selfs gesonde internasionale belangstelling.
“Daar sal beslis nog sulke veilings aangebied word.”
Hy sê die aanlynformaat is uiters geskik vir die verhandeling van renosterhoring omdat bieërs op so ’n veiling anoniem kan bly en hul veiligheid dus nie in die gedrang kom nie.
$10 000/KG?
Mnr. Piet Warren, ’n bekende renosterboer van Limpopo, het die Vrydagoggend ná die veiling gesê dit lyk of renosterhoring op die veiling ’n gemiddelde prys van R71 000 per kilogram haal. Jones sê die prys het uiteindelik egter hoër gesluit. Hy sê dit behoort veilig te wees om ’n wettige prys van $10 000 (sowat R130 000) per kilogram te verwag.
Die renosterhoring wat wettig teen dié prys verkoop word, mag nie Suid-Afrika verlaat nie en kopers en verkopers dryf hoofsaaklik handel in eienaarskap sertifikate. Die prys situasie kan drasties verander as wettig verhandelde horing uiteindelik uitgevoer mag word.
In die hoofmarkte van Viëtnam en China behaal onverwerkte renosterhoring sowat $60 000 (R779 500) per kilogram en in verwerkte vorm – hetsy as juweliersware of mediese bestanddeel – byna $120 000 (R1,5 miljoen).
“As dit later wettig sou wees om dié renosterhorings uit te voer, sal dit moeilik wees vir onwettige handelaars om met wettig geoeste horings mee te ding. Renosters waarvan die horings wettig geoes word, is ’n hernubare bron. Hulle word nie, soos met onwettig geoeste horings, doodgeskiet nie.”
DNA
Jones sê daar word tans omtrent 1 100 stelle renosterhorings onwettig uit Suid-Afrika gesmokkel. Aangesien wettig geoeste horings aan al die regsvereistes en wetgewing voldoen, is daar deeglike aantekeninge van DNS en eienaarskap daarvan. Dit sal moeilik wees om horings van gestroopte renosters wettig uit Suid-Afrika te kry as internasionale handel toegelaat sou word.
“Die groot wenners in hierdie hele proses was die renosters,” sê Jones.