BOERE KRY TREKKERS TERUG DANKSY SLIM SPEURWERK
TWEE trekkers wat vroeër vanjaar by ’n boerdery by Ogies gesteel is, is danksy goeie speurwerk terug by hul eienaars.
Mnr. Jaco Truter van die Truterboerdery op die Hoëveld sê hulle het die afgelope jare kwaai onder werktuigdiefstal deurgeloop.
“Die boerdery bewerk lande wat ver van die opstal is, wat beteken dat trekkers soms in die lande moet oornag. Die diewe het die wagte wat die trekkers bewaak het, oorval en vasgebind en daarna is hulle met die trekkers vort,” sê hy.
Truter en twee plaasbestuurders, mnre. JC le Roux en Thinus Major, asook Jaco se neef, Edmund, het aanvanklik saam met die Suid-Afrikaanse Polisiediens die spore op plaaspaaie in die rigting van Bronkhorstspruit gevolg tot waar dit by ’n teerpad doodgeloop het en die trekkers vermoedelik op ’n vragmotor gelaai is.
“Ons het besluit om kringtelevisie-inligting van verskillende besighede in Bronkhorstspruit aan te vra en so kon ons agterkom dat die trekkers wel in die vroeë oggendure deur die dorp is,” sê Truter. ’n Helikopter is ook in die soektog ingespan.
EKSTRA HULP
Die boerdery het daarna besluit om die dienste van Mavcorp, ’n private speurdiens, in te roep met me. Vasti du Preez wat die ondersoek gelei het. Du Preez het vasgestel dat die trekkers op ’n plaas in Limpopo was. Die boere en Du Preez het na die plaas gegaan en hul trekkers daar gevind.
“Benewens ons twee trekkers was daar ook ’n Claas-baler, asook ’n Landini-trekker en ander trekkers wat volgens hul VIN-nommers as gesteel aangemeld is,” sê Truter. Nadat die gesteelde trekkers na die naaste polisiekantoor gebring is, het die Truter-boerdery sy trekkers teruggekry. ’n Verdagte is in hegtenis geneem en die saak duur voort.
“Ons boodskap aan boere is om nooit op te gee nie. Ons het net besluit dat ons met die ondersoek sal bly voortgaan tot die trekkers gevind is.”
SOSIALE MEDIA
Edmund het ook raad vir boere by wie trekkers gesteel is: “Moenie dit stil hou nie. Gebruik sosiale netwerke, werk saam met die boere in jou omgewing en werp lig op die situasie. Ons het reaksie van boere van reg oor Mpumalanga gekry wat saam op die uitkyk was vir die trekkers en by wie daar ook trekkers gesteel is.”
Du Preez het boere ook gewaarsku teen trekkers en werktuie wat teen spotgoedkoop pryse geadverteer word en waarvan die registrasiedokumentasie nie beskikbaar is nie. “As dit lyk of dit te goed is om waar te wees, hou eerder verby. Deur hierdie trekkers of werktuie aan te koop, steel jy eintlik van jou buurman en medeboere,” het sy gesê.
Truter meen dat boere ook hul trekkers kan modifiseer om uitkenning te vergemaklik. “Dit kan ’n reeksnommer wees wat jy met ’n pons aanbring, of ’n merk waarvan net jy kennis dra. Die punt is om te verseker dat jy jou trekker vinnig kan uitken sodra hy weer teruggevind is,” sê hy.
–