BOERDERY BIED UITKOMS VIR DUISENDE
DIE wolbedryf in die kommunale dele van die Oos-Kaap is danksy die werk van kommersiële wolboere nou 30 000 boere sterk en onderhou nagenoeg 180 000 mense, het mnr. Lawrence Maduna, voorsitter van die Oos-Kaapse Kommunale Wolkwekersvereniging, op dié organisasie se sesde jaarkongres gesê.
Sowat 1 000 boere het die kongres op Dutywa bygewoon, waar Maduna in sy voorsittersrede gesê het die Nasionale Wolkwekersvereniging (NWKV) het nagenoeg 27 000 kommunale lede wat meer as 4 miljoen skape besit en jaarliks sowat 6 miljoen kilogram wol skeer. Dit verteenwoordig 13% van die Suid-Afrikaanse skeersel.
Maduna sê altesame 84% van die huishoudings het spaarrekeninge en slegs 48% van die ou- ers wat met wolskape boer, het nodig om geld vir hul kinders se skoolopleiding te leen.
Hy het ’n beroep op die Departement van Landelike Ontwikkeling en Grondhervorming gedoen om die Nasionale Wolkwekersvereniging se kontrak vir die genetiese verbetering van die kudde en die oprigting van skeerhuise met nog vyf jaar te verleng.
SUKSES VAN RAMPROJEK
Deur die bemiddeling van die NWKV is 45 000 ramme met goeie teelmateriaal vanaf 2002 aan boere hier beskikbaar gestel. Wolproduksie het van 2002 tot vanjaar gestyg van 223 000 kilogram tot 5,7 miljoen kilogram ter waarde van byna R300 miljoen.
Die grootste knelpunte waarmee boere hier worstel, is, vol- gens hom, vee- en woldiefstal, roofdiere, rondloperhonde, biosekuriteit, klimaatsverandering en onvoldoende omheining.
As ’n blyk van waardering vir die kommunale boere se werk het die NWKV gereël dat al sy provinsiale voorsitters ook dié kongres bywoon. Al die voorsitters buiten dié van die Vrystaat en die Wes-Kaap was daar.
—