REËN BRING WEINIG UITKOMS VIR BOERE IN DIE GAMTOOSVALLEI

ONDANKS die sowat 20 mm reën wat middel Augustus in die opvanggebied van die Kougadam in die Gamtoosvallei uitgesak het, het die dam min daarby baat gevind en was dit op 28 Augustus net 14,73% vol.

Mnr. Andrew Murray, hoofwaterbeheerbeampte van die Gamtoos-besproeiingsraad, sê omdat dit so droog is, was daar feitlik geen watervloei nie. Die laagste vlak sedert die dam gebou is, was 9,8% in 1992. Besproeiingsboere se kwotas is reeds met 60% ingekort.

Die Loeriedam waaruit Port Elizabeth sowat 20% van sy waterbehoefte mag onttrek, was egter 74,4% vol.

SLIM WATERPLANNE

“Maar dit is nie asof almal hier op ’n hoop gaan sit en wonder wat gaan gebeur nie. Hoewel daar sekere gewasse, soos mielies, is wat nie geplant gaan word nie, het boere wat groente onder kontrak verbou, reeds met hul medeboere ooreenkomste aangegaan om die beskikbare water beter te benut.

Meer as 90% van die sitrusboere het reeds na drupbesproeiing omgeskakel en het ook grondvogmeters geïnstalleer om die beskikbare water optimaal te gebruik.”

Murray sê die geskiedenis toon dat daar in die verlede elke maand van die jaar al oorstromings was.

“Almal met wie jy hier praat, meen dit sal weer gebeur. Die onlangse neerslag in die distrik van tot 30 mm het almal nuwe moed gegee dat uitkoms op pad is.”

Die bestuurders van die landbou-ondernemings op Patensie met wie Landbouweekblad gepraat het, het bevestig dat hulle ondanks die droogte nog flink sake doen.

Tog was daar ’n afname in die aankope van kunsmis en plaagbestrydingsmiddels.

GOEIE LENTE?

Elders in die Oos-Kaap is boere optimisties ná goeie reën en gepaardgaande kapok die afgelope weke oor groot dele van die provinsie.

Mnr. Wayman Kritzinger, ondervoorsitter van Agri OosKaap, sê boere van Cathcart, wat verlede maand onder erge veldbrande deurgeloop het, het tot 50 mm reën gemeet. In die kusgebiede van Plettenbergbaai af tot by Oos-Londen en in die binneland van Port Elizabeth af tot by Barkly-Oos het 20 mm tot 55 mm geval.

“Hoewel dit nog te koud is vir die veld om te groei, sal dit baie help as die weer warmer word. Indien daar opvolgreën is, kan ’n goeie lente te wagte wees.

Dit is nie asof almal hier op ’n hoop gaan sit en wonder wat gaan gebeur nie.