Ontwikkelingskorporasie gretig om in landbou te belê
LANDBOUVERWERKING en die landbouwaardeketting word in die nywerheidsontwikkelingskorporasie (IDC) se jongste jaarverslag uitgesonder as ’n voorrang-waardeketting waarop klem gelê moet word.
Dit word toegeskryf aan die arbeidsintensiewe aard van dié sektor vergeleke met ander sektore. Die verslag lui dat vir elke R1 miljoen wat in die sektor belê word, word 6,6 werkgeleenthede geskep. Dit is in vergelyking met net 0,7 werkgeleenthede per R1 miljoen in die chemiese en farmaseutiese bedrywe en 1,1 werkgeleenthede in die metaal- en mynbouwaardeketting.
“Ons glo die landbouverwerkingsen landbou-waardeketting speel ’n belangrike rol in die ekonomie. Ons besef die noodsaaklikheid om dié waardekettings tot hul volle potensiaal te ontwikkel in die stryd teen hoë vlakke van werkloosheid in Suid-Afrika,” aldus die verslag.
Vir die boekjaar 2018 is R203 miljoen vir projekte in die landbou-waardeketting goedgekeur uit IDC-geld en R79 miljoen uit bronne wat die IDC bestuur, soos die mededingendheidsfonds vir landbouverwerking.
UITSTEL
Weens die droogte en ekonomiese toestande was daar baie kansellasies van finansiering wat reeds voorheen goedgekeur is. Dit het tot ’n vermindering van 79% in die werklike finansiering gelei. Weens die ekonomiese toestande is baie goedgekeurde beleggingsen uitbreidingsplanne voorlopig uitgestel.
Twee landbouprojekte wat genoem word, is ’n varswater-akwakultuuraanleg by Graaff-Reinet en ’n slagplaas met swart eienaars in Klerksdorp.
Die IDC sê in sy verslag hy wil sy vlakke van finansiering in die landbou-waardeketting tot R2,1 miljard verhoog om geleenthede wat geïdentifiseer is, verder te ontwikkel.
Hoogtepunte van die boekjaar sluit in goedgekeurde finansiering van R15,3 miljard en wins wat toegeneem het van R223 miljoen in die boekjaar 2016 tot R2,2 miljard in die boekjaar 2017 wat op 31 Maart geëindig het. Dit is ondanks gesamentlike verliese van R1,6 miljard deur Foskor en die Scaw-groep.
Foskor se verlies van R902 miljoen word toegeskryf aan ’n laer as verwagte fosfaatprys en ’n sterker wisselkoers. Die Scaw-metaalgroep is besig met ’n herstruktureringsproses om sy verlies van R787 miljoen te probeer beperk.
NUWE POSTE
Mnr. Geoffrey Qhena, uitvoerende hoof, sê deur die IDC se finansiering kon 18 192 werkgeleenthede geskep word en ’n verdere 2 675 werkgeleenthede gered word. Dit is ’n styging van 37% teenoor verlede jaar.
“Faktore wat ’n nadelige impak op ons bedrywighede gehad het, was die swak ekonomiese toestande, lae sake- en verbruikersvertroue, die invloed van die droogte, asook relatief lae kommoditeitspryse,” het Qhena gesê.