VERBRUIKERS WILWÉÉT WATHULEET
Verbruikers soek toenemend betroubare inligting oor voedselprodukte. “Eindverbruikers wil presies weet wat hulle gaan eet: Die produk se kenmerke, bestanddele, waar dit verbou is, of dit op ’n aanvaarbare manier verbou is, en of dit omgewingsvriendelik gedoen is,” sê mnr. Thomas Robbertse, uitvoerende hoof van die SuidAfrikaanse naspeurbaarheidsgroep iQ Logistica.
Hy sê die magsewewig verskuif al hoe meer van die aanbodkant na die verbruiker toe. Danksy die internet en sosiale media het verbruikers toegang tot meer inligting en ook ’n stem om byvoorbeeld ’n boodskap oor bederfde kos te versprei. Thomas sê mnr. Doug McMillon, president en uitvoerende hoof van die Amerikaanse kleinhandelreus Walmart, wat ’n beherende belang in die SuidAfrikaans gebaseerde Massmart besit, het vroeër vanjaar gesê verbruikers gaan toenemend by handelaars koop wat naspeurbaarheid navolg. iQ Logistica het drie jaar gelede ’n sagtewarestelsel ontwikkel waarmee naspeurbaarheid en die volhoubaarheid van produkte gemonitor kan word. Só kan ’n produk se hele waardeketting nagespeur word, sê mnr. Hennie Ras, hoofspesialis van naspeurbaarheid en bedryfsigbaarheid by iQ Logistica.
Thomas sê dit word reeds byna drie jaar lank deur die katoenbedryf gebruik. Onderhandelings is ver gevorder om dit ook in onder meer die rooivleis, pluimvee en wolbedryf te gebruik.
Vir die verbruiker is die sigbare deel van dié tegniese stelsel die kommunikasiestelsel iQ Thentic. Dit behels ’n blitskode (QRkode) op die produk, wat die verbruiker op sy slimfoon kan skandeer om inligting oor die produk se vervaardiging te kry – selfs tot by die plaas.
Thomas sê die blitskode maak dit ook vir die verbruiker moontlik om terugvoering oor die produk te gee. — CARIEN KRUGER
NAVRAE: Epos: thomas.robbertse@iqlogistica. com; tel. 082 090 1027.