Wêreldmarkvirkoring ’ndeurmekaarprentjie
Die wêreld is omtrent toegegooi onder koring. Die gevolglike laer pryse verminder marges van hier tot in Amerika. Kopers is ook bekommerd oor die lae proteïenvlakke van oeste in van die voorste koringuitvoerlande.
Namate berigte inkom oor rekordoeste in die Swartsee-gebied en dat die gesamentlike eindvoorraad na verwagting vanjaar die grootste nog gaan wees, bly koringpryse betreklik laag. Kleiner koringoeste met ’n hoë proteïeninhoud het wel pryse in Julie laat styg.
Die jongste raming van die aanbod van en vraag na koring in die wêreld, wat maandeliks deur die Amerikaanse departement van landbou bekend gemaak word, toon dat koringboere vanjaar 743,2 miljoen ton gaan oes. Dit is 2% minder as die rekordoes van 755 miljoen ton wat in 2016-’17 behaal is (sien GRAFIEK 1 ).
Die groot oes is ten spyte daarvan dat groot koringuitvoerlande, soos Amerika, Kanada en Australië, vanjaar kleiner oeste verwag vanweë hitte en droogte.
Aan die ander kant het lande in die voormalige Sowjetunie die afgelope seisoen besonder goeie landboutoestande ervaar. Hulle behoort gesamentlik 8,6 miljoen ton meer koring te oes (sien GRAFIEK 2 ). Daarvan gaan 5 miljoen ton uit Rusland kom, wat vanjaar ’n rekordoes van 77,5 miljoen ton koring kan insamel.
Hoewel die wêreldvoorraad van koring na raming in 2017-’18 die hoogste vlak van 264,7 miljoen ton gaan bereik, het www.
bloomberg.com, ’n finansiëlemediamaatskappy, in Junie geskryf China hou sowat die helfte van dié voorraad, maar China voer baie min koring uit (sien GRAFIEK 3 ).
Skaars ’n dekade het verloop sedert 2007, 2008 en 2009 toe daar groot angstigheid was oor lae verhoudings tussen die eindvoorraad en verbruik van koring. Dié verhouding is ’n maatstaf van die aanbod van en vraag na kommoditeite en kan ’n uitwerking op pryse hê. Ten opsigte van kospryse en voedselsekerheid word die verhouding veral deur die Verenig-
de Nasies se Voedsel- en Landbou-organisasie (VLO) gebruik as ’n aanduiding van hoe kwesbaar ’n kommoditeit vir prysskommelinge is en om die wêreld se aandag te vestig op “potensiële of naderende tekorte”.
US Wheat Associates, ’n organisasie wat uitvoermarkte vir die Amerikaanse koringbedryf ontwikkel, se ontleding van die verslag van die Amerikaanse departement van landbou wat op 10 Augustus gepubliseer is, dui daarop dat ’n verhouding van 36% in 2017-’18 verwag word (sien GRAFIEK 4). As die voorraad in China uit die prentjie gelaat word, is die verhouding 22%.
Hoewel daar gemengde gevoelens oor die verwagte grootte van die oes en voorraad is, is daar kommer oor die proteïengehalte van die koring. Bloomberg haal ’n verslag van Societe Generale SA aan wat van ’n “oorvloed koring met ’n lae proteïeninhoud in die wêreld” melding maak.
PROTEÏEN DALK SKAARS EN DUUR
Oesverslae vir winterkoring in verskillende Amerikaanse deelstate toon kommer oor die betreklik laer proteïeninhoud van die koring wat vanjaar geoes word.
Dit is egter veral die verwagte kleiner produksie van lentekoring met ’n hoë proteïeninhoud wat kommer wek by handelaars en verwerkers en in Julie tot hoër pryse gelei het. Daar is volgens die webwerf southeastfarm
press.com veral kommer oor die uitwerking van hitte en droogte op die hoeveelheid lentekoring wat in Amerika en Kanada geoes gaan word. Die twee lande lewer sowat 60% van die koring met ’n hoë proteïeninhoud.
In Julie en Augustus het gunstige omstandighede vir lentekoring in Rusland en Kazakstan geheers, dog daar was onsekerheid oor die gehalte van die koring.
Lande in die Europese Unie, wat ook bronne van koring met ’n hoë proteïeninhoud is, ervaar vanjaar ook ongunstige toestande. Reuters het aan die einde van Julie berig dat twee weke van somerreën gedurende oestyd die gehalte van die groot Duitse koringoes bedreig. “’n Verlaging in die gehalte van die oes kan Duitsland se hoop om voordeel te trek uit die weerskade aan Amerikaanse lentekoring, in die wiele ry. Daar word verwag dat daar meer voerkoring in Duitsland gaan wees omdat boere dit nie kan bekostig om die koring te laat droog nie.”
Mnr. Tertius Carstens, ’n uitvoerende beampte by Pioneer Foods, sê Suid-Afrika voer nie juis koring van Amerika en Kanada af in nie, maar hou die situasie dop omdat die maatskappy gevoelig is vir ’n verhoging in die dollar-basisprys van koring. “Suid-Afrika koop hoofsaaklik koring van Europa, Baltiese lande en die Swartsee-gebiede, maar dié pryse is ook vir ’n rukkie hoër. Dis nie dat koring se prys so kwaai toegeneem het nie, daar was net ’n premie vir hoër proteïen.”
Tertius sê meel van koring met ’n hoër proteïeninhoud maak die bakproses makliker, maar dis duurder. “Koring wat jy koop, is altyd ’n vermenging van verskeie grade omdat daar geleenthede van die verskaffers se kant is om op te gradeer. ’n Groot deel van die aankoopbesluit is hoe jy jou mengsel saamstel.”
Baktegnologie het in die hele bedryf meer gesofistikeerd geword. “Ons verwag van meel en deeg om beter te presteer in baie uitdagende omstandighede.”
Dit beteken nie die proteïengehalte van koring sal ooit irrelevant word nie omdat die funksionaliteit van koring om deeg te vorm, daarop gegrond word. “Jy kan aanpassings maak, maar jy kan nie swak koring of te sterk koring regdokter nie. Die basis bly meel van konstante gehalte, dan kan die bakker sy resep daarvolgens aanpas.”
BRONNE: https://goo.gl/wvGThM; https://goo.gl/ Qi5GJnl; https://goo.gl/aXtS4U; https://goo.gl/xziwUn; https://goo.gl/Vmbbgu
Dit is veral die verwagte kleiner produksie van lentekoring met ’n hoë proteïeninhoud wat kommer wek by handelaars en verwerkers ...