AGRIDIGITAL SE UITDAGINGS

AgriDigital het ontstaan om drie belangrike probleme in die kommoditeitsmarkte in Australië op te los, maar daar is nog baie werk wat voorlê, sê me. Emma Weston, die uitvoerende hoof.

“Tans is die probleem die vertroulikheid van sensitiewe transaksie-inligting,” sê sy.

Die uiteindelike doel van maatskappye soos AgriDigital is om ’n protokol te skryf wat die deelnemers aan ’n transaksie die voorreg gee om vertroulike inligting te besigtig, terwyl die hele gemeenskap wat betrokke is binne die blokketting slegs toegang het tot die algemene, nie-sensitiewe inligting van die transaksie.

’n Struikelblok in die proses om ’n blokketting in werking te stel is om die huidige kommoditeitsbestuurprogrammatuur te integreer sodat transaksies op ’n enkele platform sal kan plaasvind.

“Tans gebruik baie blokketting-lede ouer programmatuur met beperkte funksies en tussenwerkingsvermoë. Vernuwende programmatuur is van kardinale belang om blokkettingtegnologie te implementeer.”

Om dié probleem te oorkom sal boere ’n inligtings-en-kommunikasietegnologiestelsel (ICT-stelsel) op die plaas moet vestig. Dié stelsel sal intyds data op die plaas insamel en dit verwerk sodat dit as transaksie-inskrywings binne ’n blokketting gebruik kan word (sien die GRAFIKA op bl. 47).