VARS EN GESOND, MAAR DUUR

Een van die grootste faktore wat Suid-Afrikaners keer om meer vars groente en vrugte te eet, is die prys daarvan.

Die BFAP het gaan uitwerk dat dit sowat R280 per maand kos vir ’n mens om twee porsies vrugte en drie porsies groente per dag te eet. Die bedrag is gegrond op kleinhandelspryse in April vanjaar. ’n Kombinasie van appels, piesangs, lemoene, tamaties, kool en pampoen is as voorbeeld gebruik.

“Dit is heel duidelik dat dit onmoontlik is vir ’n huishouding met vier mense wat R2 000 per maand verdien om R1 120 per maand aan vars produkte te bestee,” lui die verslag.

“Dié voorbeeld wys hoe belangrik die regte beleidsingrype is om gesonde kos bekostigbaarder te maak, veral vir lae-inkomste-huishoudings in die land.”

Die onlangse suikerbelasting kan egter voordelig wees vir vrugteboere. Melk en sap van 100% vrugte is daarvan kwytgeskeld. In Mei vanjaar het die

BFAP kleinhandelpryse van ’n verskeidenheid drankies (kola, vrugtesap, volroommelk en water) vergelyk.

“Die goedkoopste opsie van 100%-vrugtesappe was sowat 10% goedkoper as ’n gasdrankie. Dit kan verbruikers dalk aanspoor om minder gasdrankies te geniet en eerder 100%-vrugtesappe te kies.”

Dit hang egter af van die handelsmerk wat die verbruiker verkies, want party van die 100%-sappe is duurder as die gasdrankie.