PRIVATE GELD, SOOS BITCOIN, IS DIE TOEKOMS — DAWIE ROODT
Geld en die wêreld van geld is besig om drasties te verander, en die publiek moet bewus wees van ander vorme van geld en hoe dit magsbasisse kan verander, het mnr. Dawie Roodt, hoofekonoom van die Efficient-groep, gesê. Hy het onder meer na bitcoin verwys.
ALF skryf: Uitstekend gestel, Dawie. Mense moet hulself so spoedig moontlik van hierdie tegnologie vergewis. Vyf jaar gelede kon min mense en plekke ons help om bitcoins te koop, maar vandag is daar ’n magdom inligting. Wees egter baie versigtig en vergewis jouself eers mooi van hoe alles werk deur met ’n klein bedrag die water te toets. Kyk elke dag 15 minute na ’n YouTube-video oor die blokketting (blockchain).
Die tyd sal leer watter “geldeenheid” bo gaan uitkom, maar die blokketting is hier om te bly. Moenie verbaas wees nie as China dalk binnekort deur die blokketting wil weet waar sy volstruisvleis, pekanneute en perskes vandaan kom, wat die volstruise gevreet het en op watter plaas die volstruisvoer gekweek is.
CORRIE skryf: Hierdie dinge gebeur nou vinnig. Dit is opwindend, maar ook vreesaanjaend!
WESSEL skryf: Jy kan jou bitcoins in ’n hardeware-beursie sit en in jou kluis bêre, wat verkieslik is. Kuberkrakers kan dit dan glad nie steel nie en die Regering sal ook nie daarvan weet nie. Jy kan jou bitcoins dan net op ’n beurs plaas as jy daarvan wil verkoop.
Jy kan ook ál jou geld uit die land neem en dit in enige ander land gebruik.
Jy kan ’n Luno-beursie van die Google Playstore en iTunes aflaai om bitcoins te koop.
Op YouTube is baie om te leer in video’s deur Andreas Papadopulus. HENNIE skryf: Gaar liewer water op.
JOHANN skryf: Ek meen hierdie tipe geld is ook veilig teen staatskaping en nasionalisering. Kan jy dit gebruik om jou pensioen veilig te hou?
MIKE skryf: Ek doen dit al ’n paar jaar lank, en net in die afgelope sewe maande was daar ’n 300%-verhoging in waarde. Geen bank kan dit vir jou gee nie.