KABELJOUSKIP ‘AAN ’T SINK’

Hoewel dit betreklik goed gaan in die meeste akwakultuurbedrywe, sukkel die kabeljoubedryf om kop bo water te hou.

Die rooskleurige toekoms wat meer as ’n dekade gelede vir kabeljoutelers voorspel is, het nooit gerealiseer nie. Boonop voorspel die tekens in die bedryf geen beterskap nie. Volgens mnr. Etienne Hinrichsen, besturende direkteur van die maatskappy AquaEco, was die prys wat in destydse sakemodelle vir kabeljou voorspel is, heeltemal te hoog en die produksiekoste heeltemal te laag.

“Tensy die markprys vir kabeljou drasties toeneem, is daar nie juis ’n toekoms vir kabeljouteling nie omdat die produksiekoste so hoog is. Ten spyte daarvan dat vis wat uit die see gevang word al hoe minder raak, is die vraag steeds nie op ’n volhoubare vlak vir aanwal-produksie nie. Daar is reeds aansoek gedoen om produksie in hokke in die see, maar die omgewingsimpakstudies is nie goedgekeur nie.”

Die vooruitsigte vir perlemoen, oesters, mossels, kurpers en babers lyk egter betreklik goed. “Die plaaslike markte vir die meeste van dié akwakultuurspesies is goed, maar dit is ’n baie klein nismark. Indien babers goed bemark word, kan dit die gaping vul wat deur kwynende sardien-verskaffing gelaat word.

“Die perlemoenbedryf betree nou volwassenheid. Die prys van perlemoen het egter nie veel gegroei oor die afgelope dekade nie. Skaalekonomie het daarom al hoe belangriker geword.”