Blokketting: Is dit die toekoms?
Die eerste landbouproduk is einde verlede jaar met behulp van ’n blokketting in Australië verkoop. Dit kan die weg baan vir handel in landbouprodukte wêreldwyd.
Op 8 Desember verlede jaar het die Australiese maatskappy AgriDigital ’n nuwe era vir die verhandeling van landbouprodukte ingewy toe 23,6 ton koring die eerste landbouproduk tot nog toe geword het wat via ’n blokketting (blockchain), oftewel ’n kriptografiese platform, verhandel is.
Vir boere is dit uitstekende nuus omdat ’n blokketting betroubare en deursigtige naspeurbaarheid van produkte moontlik maak. Dit verseker ook mobiele, oombliklike betalings en die kredietwaardigheid van kopers kan vooraf nagegaan word. Die transaksierisiko, magdom middelmanne en uitgerekte betalingsvoorwaardes waarmee boere tot nou toe tevrede moes wees, word daarmee uit die weg geruim.
Me. Emma Weston is die uitvoerende hoof van AgriDigital, wat blokketting-programmatuur gebruik om transaksies af te handel. Sy sê die toekoms van blokkettings in die landbou is blink.
“Met intydse (real time) skikkings kan ons die risiko van die landbouwaardeketting, wat tans die mees gefragmenteerde waardeketting ter wêreld is, uitskakel. Alle belanghebbendes in die ketting vind baat daarby danksy toenemende doeltreffendheid, vertroue en sekerheid.”
ONMIDDELLIKE BETALINGS
In Australië vind betalings aan boere eers van twee tot vyf weke ná aflewering plaas.
“Dit bring ’n reusekredietrisiko vir boere mee,” sê Emma. Met die genoemde blokketting-transaksie het die betaling aan die boer plaasgevind die oomblik toe die produk aan die koper gelewer is.
“Die verkorte betaaltydperk haal die onsekerheid uit transaksies, aangesien ’n
‘As ons verby die ophef kan beweeg en eenvoudig beter besigheid doen, is blokketting beslis die toekoms van die landbou.’
blokketting nie die transaksie sal goedkeur indien die koper nie die geld kan verseker voor die transaksie plaasvind nie,” het Emma in ’n onderhoud met S&P Global Platts, een van die mees vertroude inligtingsbronne oor kommoditeitsmarkte, gesê.
AgriDigital verskaf ook ’n werkvloei-outomatiseringsdiens deur slimkontrakte (sien
WAT IS ’N SLIMKONTRAK? ). In hierdie kontrak word die voorskrifte en verwagting van die boer én die koper uiteengesit. So sal die koper byvoorbeeld die gehaltevereiste in die kontrak inskryf. Die gehalteversekering word met behulp van tegnologie (intydse metingsinstrumente en onafhanklike ouditeurs, soos weegbrûe en gehalte-toetsers by silo’s) van oes tot aflewering opgeneem en teen die kontrak getoets.
“Die invordering van heffings en tantieme, asook oorbetaling aan die regte bron op ’n deursigtige manier is ’n verdere belangrike probleem wat deur blokkettings opgelos kan word, danksy die beskikbaarheid van betroubare data.
“Daar is ook makliker en doeltreffender toegang vir reguleerders, gehalte-ouditeurs en owerhede tot elke transaksie.”
VOLKOME DEURSIGTIGHEID
Danksy hierdie aspek van blokkettings sê Emma ’n blokketting het baie groter potensiaal as om bloot kommoditeitstransaksies makliker en deursigtiger te maak.
“Al hierdie aspekte bring mee dat die verbruiker ten volle vertroue kan hê dat die inligting oor elke produk betroubaar is. Verbruikers sal dus presies weet waar hul
kos vandaan kom en wat daarmee gebeur het – van die produksieproses tot dit in hul huis beland.”
Om hierdie stelsels gereed te kry, sal baie meer tegnologie regdeur die waardeketting ingespan moet word om inligting intyds te versamel. Die verwerking van hierdie data om verstaanbaar, bruikbaar en betroubaar aan die verbruiker verskaf te word, is egter teoreties gesproke reeds gereed met die vermoë van ’n blokketting.
In die geval van vars groente sal ’n boer dié data digitaal kan vasvang met elektroniese opnames en onafhanklike ouditeurs wat aktiwiteite op die plaas kan bevestig. Die hele produksieproses word uiteindelik ’n “internet van dinge” (internet of things) (IoT) binne die boerdery.
Alle databasisse in ’n spesifieke boerdery word dus geoutomatiseer, van die aankope van produksiemiddele, bestuursaktiwiteite, oesdatums, verpakkingsinligting, ensovoorts, en word dan deur die blokketting as betroubaar bevestig.
Dié inligting word dan ’n vingerafdruk van daardie produk en die verbruiker kan met die klik van ’n knoppie presies sien waar die produk vandaan kom en wat daarmee gebeur het van planttyd tot etenstyd.
VERTROUE BRING LOJALITEIT
Dié stelsel bestaan nog nie, maar AgriDigital het dit in sy visier en ondersoek die struikelblokke. Volgens Emma sal die mate waartoe so ’n stelsel gemoedsrus en deursigtigheid aan die verbruiker verseker, die beste waardetoevoeging wees wat boere kan maak.
“Deur die verbruiker se vertroue te wen, verseker jy lojale verbruikers.
“Soos mense in die verlede – toe die internet pas aan die gang gekom het – voorspel het die internet is net ’n foefie, voorspel mense dieselfde van blokkettingtegnologie.
“Dit is duidelik dat blokkettings beduidende probleme in die landbouwaardeketting kan oplos.
“Die struikelblok vir blokkettings en landboutegnologie in die algemeen, is om die tegnologie aan lewensvatbare sakemodelle te koppel. Blokkettings moet geld en tyd bespaar, die landbousektor vorentoe neem en nuwe waarde skep.
“As ons verby die ophef kan beweeg en eenvoudig beter sake doen, is blokkettings beslis die toekoms van die landbou,” sê Emma.