DIE ANDER SÊ
DIE internasionale sentrum vir landbou en biowetenskap (CABI) sê die herfskommandowurm is nou ’n permanente landboukwessie vir Afrika nadat dit sedert sy aankoms verlede jaar in 28 Afrikalande aangemeld is. Die CABI sê as die plaag nie behoorlik bestry word nie, sal dit die vasteland se tien belangrikste mielieproduserende ekonomieë tussen $2,2 miljard en $5,5 miljard per jaar kos aan verlore oeste.
Namate boere plaagdoders aanwend om skade te verminder, loop hulle die risiko dat die plaag weerstand teen middels opbou, wat reeds ’n wydverspreide probleem in die Amerikas is. Bio-plaagdoders hou ’n laer risiko in, maar min van dié produkte is al goedgekeur vir gebruik in Afrika, wat die behoefte aan dringende plaaslike proewe, en die ontwikkeling en registrasie van plaaslike produkte benadruk.
“Mielies kan herstel van gedeeltelike skade aan die blare. As boere dus blaarskade sien, beteken dit nie noodwendig hulle moet ’n plaagdoder toedien nie. Navorsing en ’n groot bewusmakings-en opvoedingspoging is dringend nodig sodat boere hul landerye kan monitor en kan besluit of hulle die plaag moet bestry, en, indien wel, hoe,” sê dr. Roger Day, koördineerder vir sanitêre en fitosanitêre aangeleenthede by die CABI.
Navorsing is ook aan die gang om ’n natuurlike, biologiese plaagdoder te identifiseer, soos ’n parasitiese perdeby wat sy eiers in die herfskommandowurmeiers lê. Day meen dit kan met verloop van tyd die volhoubaarste oplossing vir Afrika se nuutste plaag wees. * Lees ook die artikel op bl. 14.