HOU OP TERUGKYK EN MIK HOËR
SUID-AFRIKA spits hom te veel toe op bedreigings pleks van gesamentlike groeimoontlikhede, en moet meer klem daarop lê om as ’n nasie internasionaal mededingend te wees, meen dr. Herman van Schalkwyk, groephoof van Suidwes Landbou.
“Hoe is dit dat ons in Suid-Afrika onsself so in die verlede vasgevang kry en die konteks waarin ons sake doen, vergeet? Is ons ’n nasie wat wil wen? Dit is belangrik dat Suid-Afrika die nasie-konsep weer opneem en die burgers hulself afvra hoe hul strategiese plan lyk om te wen.”
Hy sê doeltreffendheid word deur arbeidsonrus, arbeidswetgewing en die beleidsomgewing in die wiele gery. Ironies genoeg, beter produktiwiteit sal tot hoër lone lei omdat eenheidskoste dan laer is. Dit sal ook tot laer inflasie lei. “Een van die faktore wat inflasie aanwakker, is wanneer jou produktiwiteit laer is as dié van ander lande.”
VERNUWING
Van Schalkwyk het gesê ’n land wat doeltreffender is, kan meer ontwikkel wat bedrewendheid betref, en unieke produkte daarstel. Suid-Afrika gee volgens hom te veel aandag aan die prys en gehalte van sy produkte om mededingend te wees, pleks van aan vernuwing.
“’n Mededingende voordeel is die resultaat van vinnige vernuwing en verbetering, en nie van statiese voordele nie.”
Die landbou se produktiwiteit word belemmer deur lae vlakke van belegging (weens onsekerheid oor sake soos grondherhet, vorming en grondplafonne), regeringsbeleid en lae besteding aan navorsing en ontwikkeling.
Landbouskuld styg en die verhouding tussen kapitaalvorming en skuld neem af, wat beteken vir elke bedrag wat geleen word, word ál minder aan kapitaal op plase bestee. Dit bevestig dat belegging in die landbou afneem.
“Ons staan nou by die punt waar ons moedeloos is, maar moet ons nie anders onderhandel nie?
“Moet ons nie, vanweë die landbou se moontlikhede om werk te skep, vakbonde ons vennote maak nie?
“Behoort dit nie vakbonde te pla as daar oor grond gepraat word nie?”
PLAASLIKE VRAAG
Van Schalkwyk sê voorts dit is tot ’n land se voordeel indien hy veeleisende verbruikers het, want “dit laat jou beter meeding”.
Dit is dus belangrik om die plaaslike mark te ontwikkel, wat insluit dat die armer deel van die bevolking meer gesofistikeerde verbruikers word.
Volgens hom is daar ’n gebrek aan vernuwende, binnelandse wedywering, terwyl plaaslike mededinging noodsaaklik is vir globale mededingendheid.