SA OP PAD NA SOSIALISME EN KOMMUNISME
Die belangrike vraag waaroor daar onduidelikheid is, is of SuidAfrika in die toekoms steeds ’n stelsel van private besitreg en die vrye mark gaan hê, sê mnr. Louis Meintjes, herkose voorsitter van TLU SA.
Hy het in sy voorsittersrede op die organisasie se jaarkongres gesê kragtens ANC-beleid, soos vervat in onder meer die Vryheidsmanifes en beleidsdokumente, is die land op pad na sosialisme en kommunisme.
Meintjes het bygevoeg die een probleem is om dit teen te werk.
’n Ander probleem is “dat te veel rolspelers in Suid-Afrika dit hoor, maar duidelik nie die implikasies verstaan nie”.
WERKLIKHEDE
Hy het ’n beroep op boere gedoen om betrokke te wees by ’n organisasie wat die werklikhede van die tyd aanvaar en wat beding vir sy lede se beginsels sowel as die land in sy geheel.
“Dit moet die boere self wees wat praat en standpunt inneem. Dit kan nie een of ander struktuur wees waar iemand wat nie ’n boer is nie, wat geen aanvoeling vir die landbou het nie, wat nie die kultuur en karakter van die landbou verstaan nie, namens die boere praat nie.”
Meintjes het samewerking met ander organisasies bepleit, “veral met diegene wat die voortbestaan van die landbou voorop stel en die regte beginsels nastreef”.
Hy het sakeondernemings gewaarsku dat die meeste van hulle nie sonder die landbou kan bestaan nie.
Oor die onsekerheid oor eiendomsreg het Meintjes gesê as die ANC suksesvol is met die nasionalisering of ontneming van grond, “is die weg gebaan vir die totale oorname van die land se bates deur die ANC”.
Dit is dus nie net ’n landbousaak nie. “Ons is die eerste, maar saakmakende loopgraaf. As die landbou val, val die res daarna.”