VOORWAARDELIK ‘JA’ VIR AGRI SA SE NUWE STRUKTUUR

AGRI Noordwes het op sy jaarkongres sy steun aan Agri SA se planne vir ’n hersiene struktuur toegesê, op voorwaarde dat provinsiale affiliasies, oftewel produsente, se insette die kern vir die bepaling vir beleidsrigting bly.

Die kongresbesluit lui ook dat dit noodsaaklik is dat landbou-organisasies in die algemeen meer vaartbelyn en relevant vir die toekoms moet wees.

Die organisasie se herkose voorsitter, mnr. Pierre Vercueil, het ook sy onomwonde steun toegesê aan Agri SA se planne om ’n litigasiefonds te stig om hofsake oor eiendomsreg en ander aangeleenthede wat boere kan raak, te beveg.

Vercueil het gesê daar is geen ander manier om die onsekerheid oor eiendomsreg en volle vergoeding vir eiendom te besleg as wat Agri SA tans doen nie.

Hy het in reaksie op ’n aanbieding oor eiendomsreg van regter Antonie Gildenhuys gesê om sulke regte te beskerm, kos geld.

“Ons kan kortsigtig wees en sê die ledegeld van die georganiseerde landbou is te duur. As ons moet hof toe gaan, kan ons nie jou regte met ’n Mickey Mouse-begroting beskerm nie.”

Vercueil het ook die belangrikheid van swart kommersiële boere benadruk en boere aangemoedig om sakegeleenthede in bemagtiging s vennootskappe te benut. (Lees volgende week meer oor Gildenhuys se aanbieding.)

R38 MILJOEN GESOEK

Mnr. Omri van Zyl, uitvoerende direkteur van Agri SA, het gesê die beoogde litigasiefonds benodig sowat R38 miljoen om kwessies te pak, soos hidrobreking in die Karoo en die sogenoemde Msiza-saak, waar ’n regter bepaal het dat ’n plaaseienaar minder as markwaarde vir sy grond moet ontvang.

Mnr. Johannes Möller, Agri SA se voorsitter, het gesê dit is belangrik dat Agri SA vinniger a sin die verlede moet kan aanpas, want die Regerings e raadplegings tydperke oor wetgewing is deesdae baie korter en dikwels boonop rondom Kersfees en Nuwejaar.

“Ons het nie meer die luukse om oor en oor te onderhandel nie, maar net konsulteer.”

Hy het gesê die beoogde veranderinge behels nie veranderinge aan die federale stelsel, die kongres en beleidskomitees nie.

Die belangrikste verandering is dat daar ’n direksie gaan wees en wat aanspreeklik gehou gaan word.

WANVOORSTELLINGS

Oor Agri Limpopo wat ’n jaar lange moratorium op die beoogde veranderinge wil hê, het Van Zyl gesê dit was “nogal verrassend” omdat Agri Limpopo-lede saam met Agri SA deur al die prosesse is.

Möller het bygevoeg dat daar ’n klomp wanvoorstellings oor die beoogde struktuur is, soos dat buite-organisasies Agri SA kan oorneem.