Melktertroomys
Die naam sê alles. Die bekende smaak van ons gunsteling-boerekostert, maar net in roomysvorm. Absoluut heerlik.
500 ml room 500 ml volroommelk 1 vanieljepeul, gehalveer en saadjies uitgeskraap 1 kaneelstok 5 ml fyn kaneel 250 ml strooisuiker 4 ekstragroot eiergele Fyn kaneel, om oor te sprinkel
Verhit die room, melk, vanielje (saadjies en peul), kaneelstok, fyn kaneel en suiker stadig oor lae hitte, terwyl geroer word, tot die suiker opgelos is. Verhit tot net onder kookpunt en verwyder van die hitte. Klits die eiergele in ’n groot glasbak en voeg die roommengsel stadig, in ’n dun straaltjie, by. Giet die mengsel terug in die kastrol waarin die room en melk verhit is en sit dit terug op die stoofplaat. Verhit weer oor lae hitte, terwyl geroer word, tot die vla begin verdik. Dit is reg as die vla so dik soos skinkroom is en die agterkant van ’n metaallepel met ’n dun lagie bedek. Moenie dat die vla kookpunt bereik nie – dit sal skif. Laat die vla afkoel tot kamertemperatuur en verkoel dan tot koud. Haal die vanieljepeul en kaneelstok uit. Giet die vla in ’n roomysmaker of in ’n geskikte bak. Karring dit in ’n roomysmaker tot dit
soos sagte draairoomys lyk. Skep dit dan in ’n geskikte bak uit, sprinkel kaneel oor, bedek en vries tot benodig. As jy nie ’n roomysmaker het nie, bedek die bak waarin jy die yskoue vla gegiet het en vries dit tot die mengsel sag gevries is. Haal uit die vrieskas en skep die roomys in ’n groot bak. Klits dit goed met ’n elektriese klitser om die yskristalle op te breek. Skep die roomys terug in die bak, bedek en vries weer. Herhaal die proses nog een keer voor jy die roomys finaal in die bak skep, met kaneel besprinkel en vries tot benodig. Lewer 1,2 liter roomys.