SA truffelbedryf op regte spoor
Die Suid-Afrikaanse truffelbedryf begin al hoe meer bewyse oplewer wat dui op ’n gesonde belegging pleks van ’n dobbelspel.
Die Suid-Afrikaanse truffelbedryf het uiteindelik tasbare bewyse dat truffelboerdery wél in Suid-Afrika kan floreer. Dit volg nadat vyf ryp truffels by bome in ’n twee en half jaar oue eikeplantasie in KwaZulu-Natal gevind is. Hierdie gesonde, ryp swart Perigord-truffels (Tuber melanosporum) is deur ’n snuffelhond van mnr. Max Bastard van die Willowdale-boerdery naby Kokstad opgespoor. Dit bring vanjaar se oes op dié plaas op 4,5 kg te staan. Dit is benewens 250 g ryp truffels wat ook in die Koue-Bokkeveld in arm sandgrond gevind is (sien die KASSIE ).
Dié vondste het baie van die bekommernisse oor die bedryf verlig. Eerstens is dit duidelik dat die opleiding van die truffelhonde in Suid-Afrika suksesvol is. Die kans dat ’n twee en ’n half jaar oue plantasie oortrek is met truffels, is baie skraal en dit is belowend dat die hond die truffels oor ’n groot gebied kon uitsnuffel.
Kenners meen ook dit is ’n belangrike stap om te bewys dat die hele produksieproses, van die kweek van jong boompies op die Woodford Truffles-kweekplaas tot by die omsien na kommersiële eikeplantasies in Suid-Afrika, doeltreffend bestuur word.
Die bedryf is egter steeds in ’n proses om homself te bewys. Die mikpunt is produksievlakke van minstens 50 kg/ha, en Max reken selfs tot 100 kg/ha is nie vergesog nie. “Ek was van die staanspoor af oortuig dat truffels ’n winsgewende besigheid kan wees. Die tempo waarteen ons leer watter praktyke werk en watter nie, is goed genoeg om my rustig te maak oor die bedryf se toekoms.”
Teen die huidige prys van sowat R8 000/kg is dit te verstane hoekom Max hoopvol bly.
WÊRELDMARK ONDERVOORSIEN
Die Suid-Afrikaanse truffelbedryf sal internasionaal moet meeding. Volgens mnr. Volker Miros, die vader van die Woodford-truffelmaatskappy waardeur Max sy truffels bemark, word nie eens in 30% van die internasionale vraag na truffels voorsien nie.
“Die beraming van die wêreldmark is ongeveer 2 000 ton per jaar, maar tans word daar jaarliks wêreldwyd hoogstens 500 ton gelewer. Ons klem is dus op die internasionale mark en daar is groot geleenthede,” het hy gesê op ’n onlangse inligtingsessie in die Koue-Bokkeveld vir Woodford-produsente.
Twee wêreldbekende truffelkundiges, mnr. Pierre Souzat, die voormalige direkteur van die Franse truffelvavorsingsentrum, en prof. Alessandra Zambonelli van die Universiteit van Bologna in Italië, was van die sprekers.
Pierre was baie beïndruk deur die truffelvonds op die jong eikeplantasie. “Dit is bemoedigend. Die bedryf word baie professioneel bestuur, die praktyke is goed ontwikkel en perfek aangepas by die plaaslike toestande. Dit het beslis baie potensiaal. Dit is egter belangrik dat die streng genetiese
beheer wat tans hier toegepas word en dus die betroubaarheid van die Suid-Afrikaanse produk verseker, voortaan net so streng bestuur word soos wat dit tans gebeur.”
BETROUBARE TEELMATERIAAL
Die genetiese integriteit van die truffels is ’n groot kwessie omdat die internasionale mark baie gevoelig geraak het vir swak produkte. Woodford Truffles lê slegs klem op die Perigord-truffel, die gesogste kommersiële truffel ter wêreld.
Om die genetiese integriteit van die truffels te verseker, gebruik Woodford die genetiese deskundige dr. Rene Prins van CenGen in Worcester om alle inentingsmateriaal wat aan truffelboere verkoop word, te sertifiseer.
Woodford oorweeg die instel van amptelike regulasies op die invoer van truffelsoorte om te verseker daar word nie van die swakker soorte uit Suid-Afrika as Perigord-truffels in die buiteland bemark nie.
Volgens mnr. Paul Miros, Volker se seun en produksiebestuurder van die maatskappy, kan die proses nog lank duur. “Indien die ondergeskikte truffels as Perigord-truffels bemark word, gaan Suid-Afrika ’n slegte reputasie op die internasionale mark kry en gaan ons truffels minder as die helfte werd wees.”
Woodford Truffles het ses truffelboere onder sy vlerk wat altesaam 59,7 ha eikeplantasies gevestig het. Nog agt boere wil ’n verdere 65 ha eikeplantasies oor die volgende jaar vestig.