Voëlgriep: Inenting-dilemma
INENTING teen die hoogs aansteeklike voëlgriepvirus H5N8 hou ’n tweeledige bedreiging vir Suid-Afrika in – dit skep die moontlikheid dat die virus kan muteer en mense aansteek en kan ook die land se dieresiektestatus verander, wat implikasies vir internasionale handel het.
Dr. Lesley van Helden, staatsveearts in die Wes-Kaap, verduidelik dat heelwat handelskwessies só kan opduik.
“Wanneer jy inent, verander
die siektestatus van jou land, en dit kan meebring dat ander lande wat nie voorheen na Suid-Afrika toe uitgevoer het nie, dit dan sal kan doen. Handelsversperrings kan ook geskep word vir die lande waarheen Suid-Afrika se produsente uitvoer.”
Die pluimveebedryf het die Departement van Landbou, Bosbou en Visserye gevra om inenting teen die siekte te oorweeg, maar ’n finale besluit daaroor was teen druktyd nog nie geneem nie.
KOMPLEKS
Van Helden sê net soos waar mense hulle teen griep laat inent, keer dit nie noodwendig dat jy die siekte opdoen nie, maar dit maak wel die griepsimptome minder ernstig. Inenting sal dus nie keer dat pluimvee die voëlgriepvirus opdoen nie; die tekens sal net minder ernstig wees en minder voëls sal vrek.
“Inenting is iets wat ’n mens sal oorweeg as die siekte reeds endemies tot die land is – wanneer dit reeds oral versprei het en daar geen kans is om dit te beheer of daarvan ontslae te raak nie.”
Tans is die siekte egter nog nie endemies nie, en sy meen dit is tans nog moontlik om te keer dat dit endemies raak.
“Wat ons nou moet doen, is om te probeer om die siekte heeltemal uit te wis en dan hoef ons nie na
inenting te kyk nie.”
Aangesien dit die eerste keer in die land se geskiedenis is dat die H5N8-virus die pluimveebedryf tref, is daar geen vorige ondervinding wat ingespan kan word nie.
Altesaam vyf provinsies, Mpumalanga, Gauteng, die Wes-Kaap, Noordwes en KwaZulu-Natal, is deur die virus getref en streng kwarantyn maatreëls is ingestel by die 25 uitbrekings wat strek van kommersiële hoenderplase, volstruis-
plase, werfhoenders, tot uitbrekings by wilde voëls en voëls wat as troeteldiere aangehou word.
VOLSTRUISE
Daar was vir die eerste keer ook vrektes onder volstruise waar die virus naby Oudsthoorn in die Wes-Kaap opgespoor is. Altesaam 27 plase is daar onder kwarantyn geplaas en ook 19 plase in die omgewing van Heidelberg.
Van Helden meen dié voëls het waarskynlik ander siektes ook onder lede gehad.
Intussen wag geaffekteerde pluimveeboere vir die Departement van Landbou, Bosbou en Visserye om inligting rakende vergoeding bekend te maak.
Daar is R65 miljoen beskikbaar vir rampe, en amptenare by die departement het reeds met die Tesourie onderhandel om dié begroting te verhoog.