50 jaar se Brahman-lesse
Ná bykans ’n halwe eeu se boerdery met die Brahman kan mnr. Theo Dicke met gesag verklaar: Ons boer met ’n ongelooflike, goeie bees wat ideaal by Suider-Afrika se klipharde toestande aangepas is. Die eienaar van een van die oudste Brahmankuddes in Suid-Af
Van ’n klein begin met drie koeie en kalwers in 1969 wat R700 elk gekos het, het dié stoetery oor 50 jaar ’n pad van vooruitgang en rasverbetering geloop waarop sy telersgenootskap trots kan wees. En steeds wil mnr. Theo Dicke nie die boerebakkie verruil vir heeldag koffie drink op die voorstoep nie. Dit is omdat hy ’n passie het om sy kennis aan veral opkomende boere oor te dra, en veral oor kuddeverbetering.
Theo en sy vrou, Maré, boer op die plaas Spitsrand by Modjadjiskloof in die Mooketsivallei met rooi en wit stoet-Brahmane onder die stoetnaam Dicke Brahmane. Hulle het ook ’n boerdery met Brahman-stoetbeeste en Simbratipe vleisbeeste by Komga in die Oos-Kaap, waar hul seun Miles in beheer is.
Die eerste Brahmane wat ingevoer is, was nie Afrika-beeste nie. Suid-Afrikaanse boere het die Brahmane gekoop wat beskikbaar was, dus het hulle nie altyd van die beste teelmateriaal gehad nie.
Dit het lank geduur om deur strenger seleksie vir beter vleis- en melkproduksie, vrugbaarheid, temperament en prestasietoetsing ’n eie Afrika-tipe Brahman te teel. “Die Suid-Afrikaanse Brahmantelers het dus ’n meer markgerigte produk met beter vleiseienskappe, melk, temperament en gehardheid vir Suid-Afrikaanse toestande geteel.”
TRAP WÊRELDSPORE
Sommer vroeg in sy loopbaan as Brahman-stoetteler het Theo na goeie raad geluister. Die legendariese bul Manso, wat as die vader van die Brahman in Amerika beskou word, is uit die Guzerat-bul Albecrata en die Nelore-ma Penelope geteel. “Ons het besluit om hierdie wenresep te volg deur in 1982 Nelore- en Guzerat-semen uit Amerika en Brasilië in te voer om goeie rasvordering te kan maak. Dit het uitmuntende sukses opgelewer,” sê Theo. Vandag is Dicke Brahmane die oudste, bestaande Brahmankudde in Suid-Afrika.
Theo het destyds in 1986 die Brahman-wêreldkongres in Cartagena, Colombia, as ondervoorsitter van die Suid-Afrikaanse Brahmangenootskap bygewoon. Hy is ook ’n stigterslid van die huidige Brahman-wêreldfederasie. In 1998 het die eer Theo te beurt geval om wéér ’n wêreldkongres in Colombia, dié keer in Perreira, by te woon.
Hy is ook ál Suid-Afrikaner wat nog ’n referaat op ’n Brahman-wêreldkongres gelewer het. Hy het gepraat oor die integrasie van objektiewe metings, funksionele doeltreffendheid en visuele waarnemings om in die eise van ’n mededingende mark te voorsien.
BOER IN TWEE STREKE
Vandag bestaan die Dicke-kuddes uit sowat 625 stoetbeeste in Limpopo en byna