Doen jou brugjaar op Mooikrans
Mooikrans Equus is ’n opvoedkundige en opleidingsinstituut wat jong mense met behulp van perde en ’n interessante leerplan aan die landbou – en die lewe – bekend stel.
Die prentjiemooi plaas Mooikrans is geleë tussen die dorpe Amersfoort en Morgenzon op die oostelike Hoëveld. Mooikrans is wyd bekend vir sy trop van 50 goedgeskoolde en afgerigte ryperde wat ’n kernrol speel in alle programme wat aangebied word.
’n Post-MatriekEquusJaar word reeds die afgelope vyf jaar aangebied waartydens studente spesialiseer in natural horsemanship en western riding. Deeglike kennis van die perd, afrigting van ruiters, risikobestuur en die oprigting en bestuur van ’n ryskool word opgedoen. Die studente kry ook die geleentheid om praktiese ervaring op te doen deurdat hulle betrokke is by die aanbieding van opvoedkundige kampe vir skole.
Vakke wat aangebied word, is onder meer entrepreneurskap, ekonomie en gasvryheidstudies. Afgestudeerde studente werk reeds met sukses in die perdewêreld en elders.
POST-MATRIEKLANDBOUJAAR
’n Post-MatriekLandbouJaar begin in 2018. Daardeur kry almal wat daarvan droom om op ’n plaas te wees en te werk, vir ’n jaar die geleentheid om deel te hê aan al die boerderybedrywighede wat op die Hoëveld plaasvind.
Hulle kry die geleentheid om met beeste, skape, varke en hoenders te werk. Wat gewasverbouing betref, word aandag gegee aan onder meer mielies, sojabone, aartappels en hooimaak.
Die studente woon in op Mooikrans, lesings vind op die Mooikranskampus plaas en die studente word per bus vervoer na die plase waar prakties gedoen word.
Volgens me. Elna Wahl, eienaar en bestuurder van Mooikrans, is daar by boere ’n groot behoefte om jong mense, mans en vroue, wat ’n boerderyagtergrond het, in diens te neem.
“Ons weet dat daar talle jong mense is wat alles sal gee om op ’n plaas te wees. Mooikrans en die Amersfoort-boeregemeenskap bied met groot opgewondenheid vir hulle hierdie geleentheid.
“Die voordeel is wedersyds omdat ons die boer gaan help om byvoorbeeld sy beeste te doseer. Die boer sien dalk die outjie raak wat by die melkery uitblink en bied hom die volgende jaar ’n pos aan,” sê Elna.
“Ons is gewortel in die Christelike geloof en die personeel is deeglik opgelei om aan Mooikrans se standaarde en etiese kodes te voldoen om so die regte waardes uit te leef.”
Vir skoolverlaters wat nog nie seker is wat hulle ná skool gaan doen nie, is hierdie ’n uitstekende geleentheid om helderheid te kry terwyl hulle intussen beroepsgerig opgelei word.
Mnr. Frans Joubert (B.Sc.Agric.Hons.), ’n voormalige landbou-onderwyser en skoolhoof van die Morgenzon-landbouakademie, bied saam met Elna en ander landboukundiges die leersessies aan.
Organisasies, soos Landbouweekblad, die TLU SA, ProAgri en AfriForum Jeug, verleen ook hul ondersteuning aan hierdie projek.