VIER FAKTORE VERSEKER TOPPRODUKSIE
Suksesvolle truffelproduksie hang van vier kernaspekte af, sê mnr. Paul Miros, produksiebestuurder van die Woodford-truffelmaatskappy.
Die regte klimaat en grondtoestande is deurslaggewend. “Die truffel floreer in ’n kouer, Mediterreense klimaat waar daar minstens 800 koue-eenhede per jaar akkumuleer. Die pH van die grond waarin die truffels gevestig word, moet tot by 7,8 tot 8 aangepas word en deurentyd onderhou word.” Woodford lê ook klem op die gehalte van
die Perigord-spoorinenting op die wortels van die jong eikebome. “Die feit dat Max Bastard van Kokstad ’n ryp truffel by ’n boom in ’n twee en half jaar oue plantasie gekry het, is vir ons ’n bewys dat ons die regte praktyke volg om doeltreffende inenting te verseker,” sê Paul. Hy sê jy moet ook besef jy boer met
wortels en nie met bome nie. Volgens mnr. Rory Milbank, grondkundige van Eco Agri Solutions, is ’n gesonde blaredak noodsaaklik om genoeg koolhidrate te vervaardig sodat die mikorisa in die wortelsone goed kan funksioneer.
“Die perfekte klimaat in die wortelsone is egter die versekering dat die truffels optimaal ontwikkel.”
Volgens prof. Alessandra Zambonelli van die Universiteit van Bologna in Italië is dit voordelig as die voedingstatus van die grond suboptimaal vir ’n florerende boom is. “In so ’n klimaat, waar die boom nie op sy eie die nodige voedingstowwe uit die grond kan bekom nie, raak die simbiotiese verhouding tussen die boom en die truffel ál belangriker en die groei van die truffel is die belangrikste aspek van hierdie simbiotiese bestaan.” Volgens Max, wat die grootste truffelaanplanting in Suid-Afrika in vennootskap bestuur, moet daar nog met die bestuur van grondvog geëksperimenteer word. “Tans het ons die grond tot op 30% van die grondwaterhouvermoë laat afdroog. Ek dink ons kan dit effe verder laat afdroog,” sê Max.