Skaapribbetjies met suurlemoen en boegoesout
Die geure van kruie en fynbos pas baie goed by lamsvleis. Boegoe is bekend vir sy vele medisinale eienskappe, maar ’n stukkie lamsvleis met ’n sweempie boegoe smaak vorentoe. Vir hierdie resep het ek seesoutvlokkies met boegoe berook. Dit klink baie ingewikkelder as wat dit is. Probeer dit gerus, ook met ander kruie.
Boegoesout
5 ml houtsaagsels 15 ml boegoeblaartjies, grof gekap 45 ml seesoutvlokkies
Vleis
1 lamsrib, in ribstukkies gesny Vars suurlemoensap Boegoesout en vars gemaalde swartpeper na smaak
Gebraaide suurlemoen
3 klein suurlemoene, gehalveer
Voer ’n klein kastrol met aluminiumfoelie uit. Sprinkel die houtsaagsels en boegoeblaartjies op die foelie. Sit die seesout in ’n teesiffie en laat hang dit oor die saagsel-en-boegoemengsel. Bedek die kastrol dig met foelie en steek ’n paar klein gaatjies met ’n tandestokkie in die foeliedeksel. Sit die kastrol op ’n matig warm stoofplaat en verhit tot jy rook by die gaatjies sien uitkom. Berook die sout vir ongeveer 5 minute, haal dan die kastrol van die hitte af en laat staan vir 5 minute. Haal die foelie af en gooi die sout (dit sal ’n ligte, bruinerige kleur hê) in ’n bakkie.
Geur die stukkies lamsrib met suurlemoensap, boegoesout en swartpeper en braai oor matige kole tot goudbruin, bros en gaar. Dop die suurlemoen op die braairooster om sodat die gesnyde kante na die kole wys en braai tot die suurlemoene deurwarm is en die gesnyde kante begin karamelliseer. Sit die rib met die suurlemoen en bykosse van jou keuse voor. Lewer 6 porsies.