‘Loonseisoen’ in volle swang in wynbedryf

ONDERHANDELINGS, wat spruit uit ’n loonooreenkoms verlede November, is hervat by die wynkelder Robertson Winery.

Die aanleg het in November ná ’n staking van sowat 13 weke onderneem om werknemers ’n verhoging van die grootste van 8% of R400 te betaal.

Volgens me. Reinette Jordaan, menslikehulpbronbestuurder, is verder ooreengekom om vanaf Julie oor werkers se ander eise te onderhandel.

Mnr. Karel Swart, adjunkhoofsekretaris van die Commercial, Stevedoring, Agricultural and Allied Workers’ Union (CSAAWU), sê van die 23 kwessies is ses nog ter sprake.

Dit sluit in die instelling van ’n moniteringskomitee oor die skending van werkersregte of die oortreding van etiese gedragskodes, die afskaffing van ’n “klokstelsel” wanneer fabriekswerkers die toilet besoek, behuisingsubsidies, vervoersubsidies en langdiensbonusse.

LEEUWENKUIL SE STAKING GOU GEKEER

Altesaam 30 van die 37 heeltydse werkers by Leeuwenkuil Family Vineyards het bykans ’n week lank vir hoër lone gestaak. Volgens mnr. Lennox Makhasi, woordvoerder van die National Union of Food, Beverage, Wine, Spirits and Allied Wordiplomakursus kers (NUFBWSAW), het hul lede die kelder se aanbod van ’n loonverhoging van gemiddeld 7,34% aanvaar. Werkers sou weer Maandag op hul pos wees.

Volgens mnr. Pieter Carstens, hoofwynmaker, is bedrywighede by die kelder nie geraak nie en was die staking die gevolg van gewone loononderhandelings wat oudergewoonte in Junie en Julie plaasvind. “Dit is nie oor swak werkverhoudings nie en daar kan ook nie ’n vergelyk getref word met wat verlede jaar gebeur het nie (toe Leeuwenkuil in die Deense joernalis Tom Heinemann se dokumentêr Bitter Grapes verskyn het).”

Die laagste loon wat by die kelder betaal word, is R3 217,29 per maand (sonder bonusse en voor die verhoging).

Die laagste loon wat by die kelder betaal word, is R3 217,29 per maand.